2021-22 NBA season mosikad karon

CEBU, Philippines — Si Giannis Antetokounmpo mogukod og laing titulo, ang Brooklyn Nets moduwa nga wala si Kyrie Irving, samtang si LeBron James moparada sa bag-o niyang mga kauban.

Pipila lamang kini sa mga senaryo nga masaksihan sa mga fans pagsugod sa 2021-22 NBA season karong adlawa.

Sa dili pa magsugod ang bugno tali sa Milwaukee ug Brooklyn, usa ka simpleng seremonyas ang ipahigayon diin tagsa-tagsa nga madawat sa Bucks ang ilang championship ring gikan mismo ni NBA commissioner Adam Silver.

Gawas niini, pormal sab nga isaka sa Bucks ubos sa pagpangu ni Antetokounmpo ang labing una nilang championship banner sukad niadtong 1971.

Ang two-time NBA MVP mi-average og 30.2 puntos, 12.8 rebounds, ug 5.1 assists sa dihang gibisbisan sa Bucks ang 50 ka tuig nilang huwaw sa titulo.

Karong buntag, ang Bucks makigharong batok sa Nets nga wala si Irving, nga dili paduwaon sa Brooklyn gumikan sa pagdumili niini nga mabakunahan batok sa Covid-19.

Lig-on hinoon gihapon ang puwersa sa Nets tungod sa presensiya nilang 2014 NBA MVP Kevin Durant ug 2018 MVP James Harden ug ingon man sa pagbalik ni LaMarcus Aldridge ug pag-abot ni Patty Mills.

Mosalida sab sa pasiunang mga duwa si James ug ang Lakers batok sa Golden State Warriors.

Gawas sa iyang sidekick nga si Anthony Davis, itabid sab ni James ang bag-o niyang mga katropa nga sila si Russell Westbrook, Dwight Howard, Rajon Rondo, Trevor Ariza, Malik Monk, Kendrick Nunn ug Carmelo Anthony.

Ilang banggaon ang tulo ka alas sa Warriors nga sila Stephen Curry, Draymond Green, ug Andrew Wiggins. Mas kahadlokan pa unya ang Golden State kon ugaling makabalik na og duwa si Klay Thompson karong Disiembre o dili ba sa Enero sunod tuig.

Sa laing bahin, seguradong madugangan ang kadasig sa Philadelphia 76ers sa ilang pakigtige batok sa New Orleans Pelicans gumikan kay magpabilin man sa ilang poder ang All-Star guard nilang si Ben Simmons.