TNT, Magnolia magkumbati na sa PBA finals
CEBU, Philippines — Managlahi ang tumong sa TNT Tropang Giga ug Magnolia Hotshots sa dihang sugdan na nila ang ilang best-of-seven finals series alang sa 46th PBA Philippine Cup title karong adlawa didto sa Don Honorio Ventura State University gym sa Bacolor, Pampanga.
Magsugod ang ilang engkuwentro sa alas-6 sa gabii.
Suwayan sa TNT pag-angkon ang korona nga gihikaw kanila sa Barangay Ginebra Kings sa miaging season, samtang ang Magnolia nanghinaut nga palaron sa ikatulong higayon human mapakyas sa miagi nilang duha ka pagsuway nga makalangkat og titulo.
Ang Hotshots maoy unang mi-abante sa kampiyonato human gitagak ang Meralco Bolts sud sa unom ka duwa ug misunod ang Tropa Giga, nga mitikang og balik sa finals human gipalagpot ang San Miguel Beermen, 97-79, sa tinagakay nilang Game 7 niadtong Domingo.
Sandigan ni TNT coach Chot Reyes nga moabaga sa ilang kampanya mao gihapon sila si RR Pogoy, Mikey Williams, Jayson Castro, Kelly Williams, Poy Erram, ug Troy Rosario.
Ilang harongon ang lig-on sab nga puwersa sa Magnolia ni coach Chito Victolero nga gilangkoban nilang Calvin Abueva, Ian Sangalang, Paul Lee, Mark Barocca, Rome de la Rosa ug Jio Jalalon.
Si Abueva nakakuha og dugang motibasyon aron pangulohan ang Hotshots sa ilang sangka batok sa Tropang Giga tungod kay siya gihapon maoy nag-una sa karera alang sa Best Player of the Conference award uban ang 34.2 statistical points human sa semifinals.
Labing sikit nga karibal ni Abueva sa maong pasidungog mao ang teammate ra sab niyang si Sangalang, nga nahimutang sa ikatulong puwesto bitbit ang 33.0 SPs.
- Latest
