VisMin Super Cup 2nd conference kasado na

CEBU, Philippines — Andam na ang tanan alang sa pagpahigayon sa Pilipinas Vismin Super Cup Second Conference nga gikatakdang mosikad karong Nobiembre 6 sud sa usa ka bubble didto sa Pagadian City, Zamboanga del Sur.

Mao kini ang hiniusang gipadayag nilang Vismin Super Cup CEO Rocky Enghuat Chan ug COO Chelito "Coach Carz" Caro atol sa usa ka virtual meeting pipila ka adlaw pa lamang ang milabay.

Mitambong sab sa maong panagtigum ang consultant sa liga nga si Chino Trinidad, nga mipahinumdum sa tanan sa tuyo ug tumong sa pagtukod ning labing unang prospesyonal nga liga sa basketball gawas sa kaulohan.

“This is gonna be a developmental League. We don’t want to end up as a dumping ground. We want to focus on our own homegrown. A younger and more dynamic league,” dason pa ni Trinidad.

Apan sa gihisgutan sa miting mao ang bag-ong lagda sa mga players, mga rekisitos pagkuha og lisensiya sa Games and Amusement Board (GAB), format sa torneyo ug uban pang mga klaripikasyon.

Sa bag-ong patakaran sa kompetisyon, matag team tugotan nga dunay 20 ka players apan 15 lamang ang tugotan nga makapakita'g aksiyon sa matag duwa. Sa 15, kinahanglan nga dunay tulo ka homegrown players kon nagagikan mismo sa lugar nga ilang girepresentahan, unom ka players gikan sa Luzon o ex-pro, samtang ang nahibilin kinahanglan nga gikan sa Visayas ug Mindanao.

Kabahin sa format, ang mga entranteng koponan moduwa og single round-robin sa eliminasyon. Ang mangiwit nga walo ka teams matagak samtang ang top 4 dunay dunay twice-to-beat advantage batok sa No.5 ngadto sa No.8 teams. Usa lamang ka duwa ang semifinals samtang best-of-three ang kampiyonayo.

Gawas nga istriktong mosunod sa tanang mga patakaran sa panglawas ug kaluwasan taliwala ning pandemiya, kadto lamang mga nabakunahan na batok sa Covid-19 ang pasudlon sa bubble.

Si Chan ug ang tanang mga nagpaluyo sa liga naglantaw sa unahan sa usa ka mas nindot ug mas dako nga Pilipinas Super VisMin Cup.