Rivers nagdahum moduwa pa si Simmons sa Sixers
CEBU, Philippines — Nabalik na si Ben Simmons sa Philadelphia.
Apan wala pay klarong senyales kon bakwion ba sa All-Star guard ang plano niining magpa-trade ug kon moduwa pa ba kini o dili na uban sa Sixers.
Sa iyang bahin, si Sixers coach Doc Rivers naghandum pa gihapon nga si Simmons mopakita og aksiyon uban kanila sa umaabot nga 2021-22 NBA season.
"I'm assuming he's going to play, but who knows? I can't get in anyone's head," matud pa ni Rivers.
Ang 25-anyos nga si Simmons duna pay nahibiling upat ka tuig sa buhi niyang kontrata sa Sixers nga mibalor og $147 million.
Apan sukad nga nagkabangi sila sa iyang teammate nga si Joel Embiid, si Simmons bokal kaayong mipadayag sa iyang tinguha nga mopahawa sa poder sa Sixers.
Sama ni Rivers, si Sixers president Daryl Morey malaumon sab nga magpabilin sa ilang koponan si Simmons.
Si Simmons, ang No. 1 overall pick niadtong 2016 NBA Draft, mi-average og 15.9 puntos, 8.1 rebounds, ug 7.7 assissts matag duwa sa miaging upat niya ka seasons sa Sixers.
Ang Sixers gikatakda nga makigharong batok sa Detroit Pistons sa katapusan nilang pre-season game karong adlawa. Sugdan nila ang ilang kampanya sa lab-as nga NBA season batok sa New Orleans Pelicans sunod semana.
- Latest