Naki Warriors milansang ikaduhang daug

CEBU, Philippines — Ang Lapu-Lapu City Naki Warriors mikulit sa ikaduha niining sunod-sunod nga daog human gipayaka ang Davao Executives Chess Society sa ikaduhang hugna sa Professional Chess Association of the Philippines (PCAP) Open Conference niadtong Miyerkules sa gabii. Gipangulohan nilang Saudi-based Cebuano National Master Elwin Retanal, Woman International Master Bernadette Galas ug Anthony Makinano, gilampornas sa Naki Warriors ang guest team gikan sa Davao, 16.5-4.5.

Ang Naki Warriors, nga gilangkoban sab nilang Michael Joseph Pagaran, Linky Yap, Brylle Arellano, ug Allan Pason, mipatigbabaw sa blitz, 5.5-1.5, sa wala pa gikastigo ang Davao sa rapid play, 11-3. Anaa hinuon gihapon ang Lapu-Lapu sa halayo nga ikapitong dapit sa Southern Division standings uban ang ang 2-3 win-loss record.

Sa laing bahin, ang Toledo City Trojans nakatilaw sa ikalima niining sagunson nga pilde human gilampornas sa All-Filipino Conference champion Laguna Heroes, 4-17.

Ubos sa pagtimon nilang Grandmasters Rogelio “Banjo” Barcenilla Jr., ug John Paul Gomez, Woman NM Jean Karen Enriquez, FIDE Master Jose Efren Bagamasmad, ug Vince Angelo Medina, ang Laguna nakigsawo karon sa liderato sa North uban sa San Juan Predators, Pasig King Pirates, ug Manila Indios Bravos bitbit ang managsamang 5-0 nga baraha.