Irving dili paduwaon sa Nets

CEBU, Philippines — Ang Brooklyn Nets nakahukom kagahapon nga dili nila paapilon sa ilang mga praktis ug ingon man dili paduwaon ang star guard nilang si Kyrie Irving sa umaabot nga 2021-2022 NBA season nga magsugod na sunod semana.

Kini gumikan sa pagdumili ni Irving nga magpabakuna batok sa Covid-19.

Matud pa ni Nets general manager Sean Marks nga wala sila'y laing mahimo kun dili ang pagpakanaog sa maong malisud nga desisyon gumikan sa pagmagahi ni Irving nga mabakunahan.

Giklaro ni Marks nga dawaton lamang nila og balik si Irving kon ugaling nabakunahan na kini batok sa gikahadlokang virus nga hangtud karon padayong nanghasi sa tibuok kalibutan.

"Given the evolving nature of the situation and after thorough deliberation, we have decided Kyrie Irving will not play or practice with the team until he is eligible to be a full participant," matud pa ni Marks.

"He has a choice to make and he made his choice. My job here is to make what we deem is the best decision and the best choices for the organization as a whole," dugang pa niya.

Ang 29-anyos na si Irving kabahin sa gamhanang trianggulo sa Nets nga naglangkob sab nilang Kevin Durant ug James Harden.

Sa pagtambayayong nilang tulo, ang Nets naka-abot sa Eastern Conference semifinals apan gibuntog sila sa Milwaukee Bucks.

Karon nga lagmit mawala sa eskena si Irving, mabug-at nga tahas ang pas-anon sa Nets apan andam sila si Durant ug Harden nga mosagubang niini kauban sila si Blake Griffin ug ang mibalik nga si LaMarcus Aldridge.

Ablihan sa Nets ang ilang kampanya sa lab-as nga NBA season batok sa Bucks unya sa Oktubre 20.