Kings naka-angkon og laing kinabuhi
CEBU, Philippines — Human sa kadaogan sa NorthPort Batang Pier batok sa Alaska Aces niadtong Huybes, nahagatan pa og paglaum ang Barangay Ginebra Kings nga madepensaan ang ilang trono.
Ug gipahimuslan og maayo sa defending champion ang oportunidad nga mitugdon sa ilang palad.
Ang Kings naka-angkon og laing kinabuhi human ilang gipabakwit ang Phoenix Super LPG Fuel Masters, 95-85, sa tinagakay nilang duwa aron birahon ang ikawalo ug katapusang luna sa quarterfinals sa 46th PBA Philippine Cup niadtong Sabado sa gabii didto sa Don Honorio Ventura State University gym sa Bacolor, Pampanga.
"We're struggling, but we're able to show our winning attitude. Never say die lang talaga," matud pa ni back-up center Prince Caperal nga mitali og 19 puntos ug upat ka rebounds sa dihang ang Ginebra nakigduyog sa TNT, Meralco, Magnolia, San Miguel Beer, NorthPort, Rain or Shine ug NLEX sa playoffs.
Si Stanley Pringle miamot og 17 puntos uban ang walo ka rebounds ug upat ka assists, si Christian Standhardinger dunay 15 puntos ug 12 ka rebounds samtang si Jared Dillinger midugang og 14 puntos alang sa Kings, nga duna pay bukid nga tungason gumikan kay sunod nilang sangkaon mao man ang top seed TNT Tropang Giga sa Final Eight.
Kini nagpasabot nga kinahanglan buntogon sa Kings ang inilog nga Tropang Giga sud sa duha ka higayon aron buhion ang ilang kampanya pagpanalipod sa ilang titulo.
- Latest
