Usyk gilangkatan og korona si Joshua

CEBU, Philippines — Gituldokan ni Oleksandr Usyk ang paghari ni Anthony Joshua isip world heavyweight champion sa dihang iya kining gipilde pinaagi sa makapakurat nga unanimous decision human sa 12 ka hugna nilang kumbati kagahapon didto sa Tottenham Hotspur Stadium sa London, England.

Giabibahan man tuod si Joshua sa bagang panon sa iyang fans nga miabot ngadto sa 62,000 ang gidaghanon apan dili kini igo aron  makalikay siya sa makapakugang nga kapakyasan.

Gani human sa away, si Usyk miluhod dayong panguros tunga-tunga sa ring timaan sa taas niyang kompiyansa ug pagsalig nga siya maoy ideklra nga mananaog.

Tuod man, ang tulo ka mga judges mi-iskor og 117-112, 116-112 ug 115-113 pabor ni Usyk, nga nahimong ikatulo pa lamang nga boksidor sa kasaysayan sunod nilang Evander Holyfield ug David Haye nga parehong nakampiyon sa cruiserweight ug heavyweight division.

Gawas nga gi-inat ang perpekto niyang record ngadto sa 19-0, gibaraw sab ni Usyk ang plano ni Joshua nga makigharong unta sa kababayan niining si Tyson Fury sa usa ka heavyweight unification bout.

"This means a lot for me. The fight went the way I expected it to go. There were moments when Anthony pushed me hard but it was nothing special," matud pa ni Usyk, nga nakasugakod bisan nakahiagum og gisi sa ubos nga bahin sa tuo niyang mata sa ikaupat nga hugna dayon na ngadto sa pagpatilaw ni Joshua sa ikaduha pa lamang niining pilde sa iyang karera,

Gamit ang mas hait niyang abilidad, gidominar ni Usyk si Joshua ilabi na sa naghinapos nga bahin sa ilang bugno diin makita nga bun-og na kaayo ang nawong ni Joshua sa ika-10 nga hugna.