Naki Warriors padayong miratsada, Trojans mikulit labing dakong daog

CEBU, Philippines — Ang Lapu-Lapu City Naki Warriors milansang na sab og duha ka sagunson nga daog samtang ang Toledo City Trojans mirehistro sa labing dako nilang kadaogan sa Professional Chess Association of the Philippines (PCAP) niadtong Sabado sa gabii.

Luyo sa paningkamot nilang National Master Edsel Montoya, Woman International Master Bernadette Galas, Anthony Makinano, Allan Pason, Brylle Arellano ug Linky Yap, gibalian og pako sa Naki Warriors cang Camarines Soaring Eagles, 14-7.

Human niini, gipayaka sa Naki Warriors ni playing team manager Aldwin Daculan ang Cebu City Machers, 13.5-7.5, aron paglayat nila sa ikatulong dapit sa Southern Division standings sa PCAP Open Conference uban ang 5-2 win-loss record. Ang Machers nagpabiling bokya human sa unom ka duwa.

Sa laing bahin, ang Trojans miposte sa labing impresibo nilang daog ning labing unang pro chess league sa nasud human gi-ihaw ang Mindoro Tamaraws, 19.5-1.5, ubos sa pagpangu nilang International Master Rico Mascarinas, NMs Rommel Ganzon ug Rogelio Enriquez Jr., Richard Natividad, Redentor Nailon, Ronald Ganzon ug lady player Jinky Catulay.

Wala hinoon makasustinir sa ilang kainit ang Trojans apan mipakita sila og maanindot nga labok sa wala pa miyukbo ngadto sa dekalibreng Negros Kingsmen, 9.5-11.5.

Ang Trojans natagak ngadto sa 4-3 samtang ang Kingsmen naka-angkon og bahin sa liderato uban sa Iloilo Kisela Knights bitbit ang paregong 6-0 nga baraha.

Nagpabiling way pilde ang Knights human gilampornas ang Cordova Dutchess Dagami Warriors, 16-5.

Duna hinooy angayan nga ikalipay ang Dagami Warriors gumikan kay ilang mang gipakaging ang Iriga Oragons, 12.5-8.5, alang sa ikaduha nilang daog sud sa unom ka duwa.