Mga Pinay abante sa AFC Women's Asia Cup

CEBU, Philippines — Ang Philippine women’s football team mi-abante sa AFC Women’s Asian Cup sa ikaduhang sunod-sunod nga higayon.

Bugti kini sa 2-1 nilang kadaogan batok sa Hong Kong sa katapusan nilang duwa sa qualifiers didto sa Tashkent, Uzbekistan.

Ang mga Pinay maoy nanghawod sa Group F uban ang sayes puntos.

Si Tahnai Annis maoy unang nakap-goal saa Pilipinas sa ika-17 nga minuto.

Padayong naglabaw ang mga Pinay hangtud nga gitabla ni Chung Pui Ki sa Hong Kong ang iskor sa ika-61 nga minutos sa aksiyon.

Apan wala magpa-alkansi ang mga pambato sa nasud pinaagi ni Chandler McDaniel nga milansang sa iyang goal sa ika-87 nga minuto aron pagsilyo sa daog sa Team Phl.

Mao kadto ang unang goal ni McDaniel sukad siya miduwa sa national team batok sa Nepal sa miaging semana. Gawas sa Pilipinas, ang host India, Japan, Australia, China, ug Korea naka-angkon na sab og luna sa Women’s Asia Cup.