LA Casinillo mihimo’g kasikas sa UK

CEBU, Philippines — Way hunong ang basketball alang sa Sugbuanong si Leobert Andrew “LA” Casinillo bisan og layo kaayo siya sa yuta niyang natawhan ning panahon sa pandemiya.

Og gipahimuslan og maayo ni Casinillo ang oportunidad samtang nagduwa uban sa Itchen College varsity team didto sa Southampton, England.

Uban ang kakugi, dedikasyon ug talento, ang 18-anyos nga si Casinillo mikuha gilayon og atensiyon sa eksena sa basketball didto sa Southampton.

Sa miaging bulan, si Casinillo misalmot og usa ka 3x3 event diin ang iyang team maoy milugwa nga regional champion hinungdan nga mi-abante sila sa national finals.

“We managed to reach the quarterfinals (in the nationals) despite our lack of height,” matud pa ni Casinillo, nga gikoronahang Juniors MVP sa dihang nakampiyon ang Sacred Heart School-Ateneo de Cebu (SHS-AdC) Magis Eagles niadtong 2019 CESAFI season.

“But I believe in the saying “heart over height”. I may be one of the shortest here, but I’m sure my lack in height recovers towards my heart in basketball, and I know my capabilities. I always show to everyone that I will fight no matter the cost,” dugang pa niya.

Ning bag-ohay pa lamang, si Casinillo mipakita’g aksiyon uban sa Bristol Storm. Sa usa ka higayon, mipabuto siya og 53 puntos, 18 ka rebounds ug siyam ka assists ug sa laing duwa miratsada og 54 puntos, siyam ka rebounds ug 10 ka assists. Gibayaw sab siya nga MVP ug naapil sa Mythical Five sa Southampton Filipino League.

Ang 6’1” guard gikatakda nga mosalmot sunod sa EABL (Elite Academy Basketball League), ang nag-unang U19 league sa UK nga sugdan sunod bulan.

Sa iyang pagsalida didto sa Southampton, laraw ni Casinillo nga bairon og maayo ang iyang abilidad ug andamon ang iyang kaugalingon alang sa mas dako nga hagit nga nagpaabot kaniya sa UAAP kon ugaling mabalik na sa normal ang sitwasyon dinhi sa Pilipinas.

“Since there’s no UAAP yet, I've decided to join Itchen College to do one year in preparation for the big stage, UAAP. Once this year is done and everything is set back home, I’ll head back and hopefully showcase my talent,” butyag pa ni Casinillo. Niadtong Hunyo, si Casinillo miuyon nga moduwa sa University of Santo Tomas (UST) Growling Tigers sa UAAP.

Sama sa ubang nangambisyon nga mga basketbolista, si Casinillo nagdamgo nga makatikang sa PBA ugma damlag.

“My ultimate goal is to be in the PBA, or if I’m lucky enough, play overseas such as in Japan or Europe. I want to be successful in basketball so I can repay all the things my family has done for me,” panapos pa ni Casinillo.