Donaire andam makigbugno batok ni Casimero o Gaballo
CEBU, Philippines — Andam si WBC bantamweight champion Nonito “The Filipino Flash” Donaire, Jr. nga makigsinukmagay batok sa bisan kinsa sa iyang mga kababayan nga si John Riel “Quadro Alas” Casimero o Reymart “Assassin” Gaballo sa sunod niyang away karong Disiembre 11.
Orihinal nga gisaytan ni Donaire nga usa ka unification bout uban ni Casimero, ang kampiyon sa WBO, apan kalit nga milutaw ang pangan ni Gaballo human ang nauwahi opisyal nga ginganlan sa WBC isip mandatory challenger ni Donaire.
Sa iyang Facebook post kagahapon sa kaadlawon, si Donaire mibutyag nga iyang nasayran human sa ilang Face Off interview ni Casimero sa Powcast Sports ning bag-ohay pa lamang nga dunay problema nga miulbo sud sa Team Casimero ug lagmit makabraw na sab kini sa gilaraw niyang sangka batok sa boksidor gikan sa Ormoc City. Nanghinaut hinoon ang 38-anyos nga si Donaire nga mahilot ra ang isyu tali ni Casimero ug sa manedyir niining si MP Promotions President Sean Gibbons.
“After the Face Off with Casimero, it was said there’s some internal issues in their side that need to be resolved before they move forward.Hopefully it will be resolved amicably,” suwat pa ni Donaire.
Giklaro hinoon ni Donaire nga nagpabiling bukas ang iyang pultahan nga makigharong batok sa laing Pinoy nga kampiyon nga si Gaballo, ang kasamtangang nagkupot sa WBC interim bantamweight belt.
“Gaballo is mandatory. But we all know this is boxing and as far as I know, Sean (Gibbons) handles both Gaballo and Casimero. If Casimero and Sean resolve their problems, it is possible for Gaballo to step aside but it is all up to them at this point. I am fighting Dec. with whoever steps in the ring,” dugang pa ni Donaire.
Sila si Donaire ug Casimero gikatakda na untang magbinukbukay niadtong Agosto 14 didto sa Las Vegas apan ang makasaysayanon untang engkuwentro tali mga Pinoy’ng kampiyon mikolapso human si Donaire mi-atras tungod sa dili maayong taras ni Casimero nga misangpot pa gani sa pagdisrespeto sa iyang kapikas nga si Rachel.
Gani hangtud karon nagpadayon ang mainit nga panagbangi nilang Donaire ug Casimero sa social media nga nagpasilaob og maayo sa seguradong dumot nga sangka kon ugaling mag-abot na ang ilang dalan ibabaw sa ring.
- Latest
