Simmons dili na moduwa sa Sixers
CEBU, Philippines — Gibugto na ni All-Star forward Ben Simmons sa hingpit ang iyang koneksiyon uban sa Philadelphia 76ers.
Sigun sa taho ni Adrian Wojnarowski sa ESPN, si Simmons dili na mobutho sa training camp sa Sixers sunod semana ug labaw nang dili na kini moduwa pa sa prangkisa nga iyang gikasilagan ning puntoha sa iyang karera.
Gusto sa 25-anyos nga si Simmons nga mohawa na sa tugkaran sa Sixers.
Si Simmons aduna pay upat ka tuig nga kontrata sa Sixers nga mibalor og $147 million, apil na niini ang $33 million sa umaabot nga 2021-22 NBA season.
Mao nang kinahanglan gyud nga i-trade siya sa Sixers kay dili man siya puydeng bangkoon samtang magdawat sa maong makabungog nga suweldo.
Duna hinuoy katungod ang Sixers nga mosilot pinaagi sa suspensiyon ug multa nga mokabat og $227, 613 matag duwa batok ni Simmons kon ugaling magmagahi kini pag-apil sa ilang mga aktibidades samtang anaa pa kini sa ilang poder.
- Latest