Gibbons: Pacquiao wala pa mahuman sa boksing

CEBU, Philippines — Kon ang presidente sa MP Promotions nga si Sean Gibbons maoy pasultihon, wala pa mahuman si Manny Pacquiao sa boksing.

Gipaambit ni Gibbons kining maong klaripikasyon human si Pacquiao daw mipadayag nga miretiro na siya sa boksing sa dihang eksklusibong nahinabi sa “Toni Talks” uban ni host Toni Gonzaga.

“My boxing career is over. It’s already over. I’ve been boxing for a long time already and my family would always tell me that it’s time to stop. I just kept going because I’m so passionate about boxing,” matud pa ni Pacquiao sa maong pasundayag nga gipasalida sa YouTube channel ni Gonzaga niadtong Lunes kon usa ka adlaw human iyang gidawat ang nominasyon sa PDP-Laban party nga modagan pagka-presidente sa Pilipinas.

“But now, I’ll just support boxers so that we can have a champion again. You can’t say this is the next Manny Pacquiao. Manny Pacquiao is just a manifestation. He is owned by the Lord, who gave all the blessings,” dugang pa niya.

Apan si Gibbons, nga sinaligan ni Pacquiao sa taud-taud nang panahon, misalikway sa mga pagtoo nga hingpit nang gisab-it sa eight-division world champion ang iyang mga gloves.

“There is nothing 100% set that (Pacquiao) is done with boxing,” padayag pa ni Gibbons ngadtong Jake Donovan sa BoxingScene.com. “He will make a decision in October. (For now), he is just discussing ‘maybe or maybe not.’ Nothing official.”

Milanog ang mga panawagan nga si Pacquiao angayan nang moretiro sa boksing human siya nakatilaw og makabuak sa dughan nga kapildihan sa mga kamot ni Yordenis Ugas sa Cuba sa ilangWBA “Super’ welterweight title bout usa ka bulan na ang milabay didto sa T-Mobile Arena sa Las Vegas.

Samtang gikonsidera niya ang pagretiro sa hingpit, si Pacquiao mipakita sab og indikasyon nga gusto pa niyang mo-away ug gani nagplano siyang makig-rematch ni Ugas sa Enero sunod tuig.

Si Pacquiao, nga mag-43 anyos na sa Disiembre 17, gikatakda nga modesisyon kabahin sa ugma sa iyang karera sa boksing sa dili madugay.