Enriquez, Belano nanghawod na sab
CEBU, Philippines — Si four-time Cebu Executives and Professionals Chess Association grand champion Rogelio Enriquez ug ang batan-ong si Kristina Belano mihimo na sab og kasikas sa Prexy Jerry and Chito Arki Series #2 online tournament sa CEPCA niadtong weekend.
Si Enriquez, nga kasamtangang nagduwa uban sa Toledo City Trojans sa Professional Chess Association of the Philippines (PCAP), mikumpleto sa siyam ka hugna nga kompetisyon uban ang labing taas nga 7.5 puntos aron sakmiton ang All-Cepcans title.
Sila si Jimmy Ty Jr. ug Reynaldo Flores mipahiluna sa ikaduha ug ikatulong dapit bitbit ang 6.5 puntos matag usa samtang sila si National Arbiter Linky Yap ug Amado Olea maoy miokupar sa sunod nga duha ka puwesto uban ang 6.0 puntos.
Nakasingit si Rosendo Yamyamin sa top 6 uban ang 5.5 puntos. Sa iyang bahin, ang 12 anyos nga si Belano mikadlit og 41 puntos aton dominahon ang Cepcans B/Ladies division.
Miposte si Maria Kristine Lavandero og 35 puntos aron pag-angkon sa ikaduhang luna. Naglangkob sa top 5 sila si Joseleo Cortes ( 23 pts.), Richard Ouano (22 pts.) ug Filemon Kapuno III (15 pts.).
Ang kaluhang torneyo gipaluyohan nilang CEPCA president Engr. Jerry Maratas ug Archt. Filemon Kapuno III.
- Latest