Katapusang luna sa PBA quarterfinals sikit nga ilogan

CEBU, Philippines — Upat ka teams ang sikit nga magkumbati alang sa nahibiling luna sa PBA Philippine Cup quarterfinals.

Apil niini ang defending champion Barangay Ginebra Kings ug ingon man ang Alaska Aces, Phoenix Super LPG Fuel Masters, ug ang Terrafirma Dyip.

Ang Fuel Masters ug Dyip mitapos na sa ilang kampanya sa eliminasyon bitbit qang managsamang 4-7 win-loss records, apan pareho silang naka-standby ingkaso nga dunay playoff alang sa katapusang puwesto sa quarterfinals.

Posibleng mahitabo ang usa ka four-way tie sa No.8 kon ugaling mapilde ang 4-6 Kings sa pinal nilang duwa batok sa Meralco Bolts ug ang 3-6 Aces makadaog bisan og usa sa nahibilin nilang duwa batok sa San Miguel Beermen ug NorthPort Batang Pier.

Kon ugaling magtabla ang Ginebra, Alaska, Terrafirma, ug  Phoenix, ang Kings ug ang Aces maoy mangatagak samtang ang Fuel Masters ug Dyip magsangka alang sa katapusang luna sa quarterfinal round.

Apan kon modaog ang Ginebra ug Alaska, hayan nga ang Phoenix ug Terrafirma maoy sayong mobabay sa torneyo.

Sa pagka karon, ang segurado nang nakasud sa sunod nga hugna mao ang top seed TnT Tropang Giga, Meralco, Magnolia, San Miguel Beer, and Rain or Shine.