Pacquiao-Ugas rematch nagkahanap

CEBU, Philippines — Si Pinoy ring star Manny Pacquiao nagparamdam nga moretiro human sa makapakurat niyang mga kapildihan sa mga kamot ni Cuban champion Yordenis “54 Milagros” Ugas ensaktong usa ka bulan na ang milabay.

Inilog unta kaayo si Pacquiao apan nakatilaw og makabuak sa dughan nga kapakyasan pinaagi sa unanimous decision batok ni Ugas, nga misakmit sa WBA ‘Super’ welterweight title niadtong Septiyembre 21, didto sa T-Mobline Arena sa Las Vegas.

Gikonsidera man tuod niya ang pagsab-it sa iyang mga gloves sa hingpit apan si Pacquiao mipakita og indikasyon nga gusto pa niining mo-away pinaagi sa pagpadayag nga buot niyang makigsangka og usab ni Ugas lagmit sa Enero sunod tuig.

Bukas si Ugas nga makigsinukmagay og balik ni Pacquiao apan hanap kaayo ang posibilidad nga mahitabo kini.

Sa kasamtangan, init kaayo ang mga taho nga dunay giluto nga unification bout tali nilang Ugas ug WBC/IBF welterweight champion Errol Spence, Jr.

Dili lang kay kana ra.

Ang WBA bag-ohay pang ni-obliga ni Ugas nga makigharong ni mandatory challenger Eimantas Sationis sa Lithuania sud sa tulo ka bulan sukad gi-isyu ang ilang kamandoan niadtong Septiembre 16. 

Ang modaog sa bugno nilang Ugas ug Sationis makig-engkuwentro sunod sa modaog tali nilang Jamal James ug Radzhab Butaex aron pagdetermina kon kinsay tinuoray nga hari sa WBA welterweight dibisyon unya sa Marso 2022.

“The championship committee call(s for a) Box-Off as necessary for WBA Welterweight division in order to have one champion,” matud pa ni WBA Championship committee chairman Carlos Chavez. “Based on the hierarchy of WBA rankings the eligible boxers are: Yordenis Ugas (“Super Champion”), Jamal James (“Regular Champion”), Radzhab Butaev (“official challenger”) and Eimantas Stanionis (“leading available contender”).

“In accordance to the previous resolution, Jamal James shall box official contender in Radzhab Butaev by November 2021. Yordenis Ugas must defend the title against the next leading available contender Eimantas Stanionis within 120 days from the date of this resolution. The Super Champion must box the regular champion by the end of March 2022,” dugang pa ni Chavez.

Tungod ning mando sa WBA, misamot og kangingit ang gisaytan nga rematch ni Pacquiao uban ni Ugas. Si Pacquiao gikatakda pa hinoon nga modesisyon kabahin sa kon unsay ugma nga nagpaabot kaniya sa iyang karera sa boksing.