Paul Lee sa Magnolia maoy Player of the Week
CEBU, Philippines — Nagmangtas ang gibansagan nga ‘Angas ng Tondo’ sa PBA Philippine Cup niadtong Domingo. Si Paul Lee mibirada og 18 puntos sa katapusang kuwarter aron pangulohan ang Magnolia Hotshots ngadto sa 100-90 nga kadaogan batok sa San Miguel Beer. Sa kinatibuk-an, ang 32-anyos nga si Lee mipabuto og 32 puntos uban ang upat ka rebounds ug lima ka assists alang sa Hotshots, nga mitak-op sa ilang kampanya sa eliminayon bitbit ang 8-3 win-loss record.
Naghatag kini kanila og tsansa nga maka-angkon og twice-to-beat advantage sa umaabot nga playoffs.
Gipilde ni Lee alang sa senemanang pasidungog sa liga ang iyang teammate nga si Ian Sangalang, si Mikey Williams sa TNT Tropang Giga, si JR Quinahan sa NLEX ug ang Meralco trio nga sila si Allein Maliksi, Raymond Almazan ug Bong Quinto.
Malipayon kaayo si Lee sa labing uwahi niyang salida gumikan kay iyang napakita nga hinay-hinay nang nabalik ang maayo niyang kondisyon.
“Gusto ko lang mabalik yung tamang kundisyon ko, simula kasi nung na-injury ako, parang naging roller-coaster yung laro ko. May araw na sobrang bigat ng pakiramdam ko,” kanayon pa ni Lee. “Kumapit lang ako. I continued to work hard para mabalik ko yung kundisyon ko talaga."
- Latest
