Abueva gitukmod ang Magnolia sa quarterfinals

CEBU, Philippines — Si Calvin Abueva mipasud sa krusyal niyang itsa sa pinal nga dos segundos sa aksiyon aron aswaton ang Magnolia Hotshots ngadto sa makapaisa’g balahibo nga kadaogan batok sa NorthPort batang Pier, 90-89, sa 46th PBA Philippine Cup kagahapon didto sa DVHSU gym sa Bacolor, Pampanga.

Dalaygon kaayo ang gibuhat sa Hotshots nga madasigon nga mibangon human malubong og 17 puntos dayon na ngadto sa pagpatikalbong sa Batang Pier.

Sa dihang naglabaw ang NorthPort og usa ka lugas, 89-88, dali nga mitawag og timeout ang Magnolia.

Mao kini ang naghawan sa dalan alang sa pagkamabayanihon ni Abueva nga kalmadong milansang sa iyang tira aron pagtuldok sa kulbahinam kaayong sangka pabor sa Hotshots.

Bitbit ang 7-3 win-loss record, ang Hotshots hingpit nang naka-angkon og luna sa quarterfinals.

Duna pa sab silay tsansa nga angkonon ang No.2 spot nga dunay twice-to-beat advantage sa playoffs kon ugaling mapakyas nila og daog ang nahibilin nilang duha ka duwa.

Si Ian Sangalang maoy nangu sa Magnolia uban ang 26 puntos ug 10 ka rebounds samtang si Abueva miamot og 15 puntos, lima ka rebounds, ug upat ka assists.

Silang duha maoy responsable pagtunol sa NorthPort sa ikalima niining pilde sud sa siyam ka duwa.