US Open 9-Ball Championship Kiamco, laing 8 ka pinoy padayong miratsada

CEBU, Philippines — Ang Sugbuanong si Warren Kiamco ug laing walo pa ka mga Pinoy pabiling nanginit human sa ikaduhang adlaw sa aksiyon sa 2021 US Open 9-Ball Championship didto sa Harrah’s Resort sa Atlantic City, New Jersey.

Si Kiamco, nga duha ka higayon naka-gold medal sa Southeast Asian (SEA) Games, naka-eskapo batok sa Amerikanong si Justin Espinosa, 9-7. Sangkaon niya sunod si Francisco Sanchez Ruiz sa Spain.

Ang mga kababayan ni Kiamco nga sila si Dennis Orcollo, Johann Chua, Roberto Gomez ug Jeffrey de Luna mi-abante sab sa sunod nga hugna sa $300,000 nga torneyo human miposte og managsamang 9-2 nga daog batok sa mga Amerikanong sila si Paul Spaanstra, Kelson Juan, Lukas Fracasso-Verner, ug Bill Meacham.

Si Orcollo, nga naka-gold usa ka higayon sa Asian Games ug kalima sa SEA Games, makigtige sunod ni kanhi US Open champion Corey Deuel, samtang si Chua, nga mitapos sa ikatulong dapit sa Predator World 9-Ball Championship niadto lamang miaging semana didto sa Las Vegas, makigharong ni Christopher Lawson.

Si Gomez mohamag batok ni Fedor Gorst sa Russia, samtang si De Luna makig-atbang ni Rodrigo Geronimo sa US.

Sila si Carlo Biado, James Aranas, Roland Garcia, ug Jeffrey Ignacio padayon sab nga nagtirada sa $50,000 (P2.5 million) nga ganti human mikadlit sa ikaduha nilang sagunson nga daog.

Si Biado, ang 2017 world 9-ball champion, mibuntog ni Vincent Buearivage sa Canada, 9-3, si Aranas mipayaka sa Amerikanong si John Hennigan, 9-4, si Roland Garcia mipatigbabaw ni Konrad Juszczyszyn sa Poland, 9-6, samtang si Ignacio mipukan ni Shaun Wilkie, 9-4.

Malisud hinoon nga tahas ang sagubangon sunod ni Biado gumikan kay engkuwentrohon niya si kanhi world champion Mika Immonen sa Finland.

Si Aranas makigtige ni Pijus Labutis sa Lithuania, si Garcia makig-atbang ni Naoyuki Oi sa Japan, samtang si Ignacio makigbangga ni Chang Jun-Lin sa Chinese-Taipei.

Sa laing bahin, si Daniel Dagotgot maoy ikaduhang Pinoy sunod ni Dan Sigue nga nanamilit sa na torneyo human makatilaw og duha ka sunod-sunod nga pilde batok ni Jayson Shaw sa Scotland, 9-0, ug Jesus Atencio sa Venezuela, 9-8.