EDITORYAL - Kahago sa mga mamumuo

Ang mga Pilipinong mamumuo maoy usa sa mga labing hago o stressed nga mamumuo sa Southeast Asia, sumala pa sa usa ka pagtuon nga gihimo nga gipagawas ang resulta karon lang tuiga.

Ang Gallup mihimo og State of the Global Workplace Report nga giingong nagrepresentar o naghulagway sa estado ug hiniusang tingog sa tanang mga mamumuo sa tibuok kalibotan. Sa gipagawas niini nga 2022 State of the Global Workplace report, natala sa Gallup ang pinakataas nga stress levels sa mga mamumuo tibuok kalibotan ug usa ang Pilipinas niini.

Matud pa nga sa 1,000 ka Pilipinong mamumuo nga gipangutana sa Gallup, 50 porsiyento nila ang miingon nga nakasinati sila og grabeng stress sa trabaho.

Giingon nga mas taas kini sa global average o kasarangan nga 44 porsiyento sa kalibotan. Tungod niini, nalabwan pa sa Pilipinas ang mga silingan sama sa Thailand (41 percent), Cambodia (38 percent), Myanmar (37 percent), ug Vietnam (37 percent).

Ang Pilipinas nabutang sa ikaduhang talaan sa rehiyon niadtong mga magul-anong mamumuo kada adlaw pinaagi sa 32 porsiyento ug ikatulo sab kini dunay mga mamumuo nga naglagot sa trabahoan kada adlaw pinaagi sa 24 porsiyento.

Apan luyo aning mga negatibong kasinatian sa mga mamumuong Pilipino, nakita sab sa maong survey ang mga mamumuo sa Pilipinas nag-una gihapon sa pagkakugihan sa trabaho pinaagi sa 31 percent. Gihulagway sa Gallup nga daw maoy tag-iya sa gitrabahoan ang mga Pilipino pagkugi para sa kumpanyang ilang gialagaran.

Samtang maayo kining paminawon apan makauuwaw kini sa habig sa mga magpapatigayon nga wala makakita sa pag-antos sa ilang mga mamumuo, nga bisan sa kagamay sa sweldo ug walay mga benepisyo ang uban naa gihapon ang pagkugi.

Mao nga makapangutana gyud usahay kun nganong bisan pa sa mga maayong hiyas sa mga mamumuo nga Pilipino daghan man gihapon ang nagkalisod sa kinabuhi. Dili ba kaha tungod kini sa pagkahakog sa mga magpapatigayon nga walay laing gitan-aw kondili ang ginansiya ra sa kataposan na ang kahimtang sa mga nagtrabaho pagpalambo sa ilang mga kompanya?