Gamhanan si WF?

Gihinganlan sa Senate Committee of the Whole ang 22 ka mga personalidad nga nalambigit sa smuggling sa mga produkto nga pang agrikultura. Ang 22 gihulagway sa Senado nga mga protector ug smuggler. Ang gihinganlan mga protector mao ang mga opisyal sa Bureau of Customs samtang ang uban mga smuggler.

Naapil sa lista nga gisumiter ni Senate President Vicente Sotto III ngadto kang President Ferdinand Romualdez Marcos Jr. ang duha ka mga taga Sugbo nga giingon nga smuggler nga mao sila si Aljun Diamante ug Jude Logarta. Ang lista ni SP Sotto iyang giingon nga gikan sa taho sa National Intelligence Coordinating Agency o NICA.

Apan ang tunog kaayo nga pangalan diha sa pantalan ug sa palibot sa Bureau of Customs sa Port of Cebu nga si WF wala man maapil sa listahan ni SP Sotto nga iyang gibasi sa NICA. Ambot, intelligent pa ba kaha ang mga ahente sa NICA?

Ang kasaba sa smuggling utanon ug uban nga produktong agrikultura milanog na kini sa wala pa ang eleksiyon niadtong Mayo 9 ning tuiga.

Dinhi sa Sugbo, lanog kaayo ang pangalan nga WF sa smuggling sa utanon. Giingon nga dili madutlan kining maong smuggler tungod sa iyang koneksiyon ngadto ni Vice Presidente Sara Duterte Carpio, iyang bana nga si Atty. Mans Carpio ug kanhi Cabinet Secretary Jun Evasco.

Ang pangalan ni WF kadaghan na migawas sa baba ni Senador Panfilo Lacson atol sa imbestigasyon nga gihimo sa Senado mahitungod sa smuggling sa carrots dinhi sa Sugbo. Gani mao kini ang rason ngano nga ang Duterte-Carpio Law firm nipadala og suwat sa Bureau of Customs sa Port of Cebu aron ipanghimakak ang kalambigitan sa pangalan sa anak sa Presidente ngadto ni WF.

Sa akong pagbasa sa list ani SP Sotto sa mga pangalan sa mga smuggler wala maapil ang pangalan ni WF. Dinhi makaingon ko nga kublan ug dili gyod diay madotlan kini si WF.

Hagit nako sa bagong Presidente, kun gusto man nimong mawagtang ang smuggling, unaha sa pagkuha kini si WF. Ang NICA nakaila kins ani siya. Wala lang nila giapil sa lista kay kublan man ni siya.