Mas dinalian ang showbiz
Sukwahi sa iyang pangangkon sa kaandam sa pagbanos sa gobiyerno ug pagsulbad sa labing dagkong problema sa nasud, nagpaabot si Presidente Ferdinand Marcos Jr. sa ikalimang adlaw sa iyang administrasyon una nipatawag sa labing unang tigom sa mga sakop sa iyang gabinete.
Nga igo lang nakapabantang sa bakante nga mga lingkoranan. Kay wa pa katudlo hangtod karon sa mga pangu sa labing importante nga mga departamento sa iyang administrasyon. Ug timaan sa kalidad sa mga isyu nga natuki ang sulti sa usa sa nakatambong: “Wa mauwahi ang presidente sa pag-abot.”
* * *
Sa pag-asumir sa katungdanan sa nangaging mga pamunoan nilang anhing Presidente Noynoy Aquino sa 2010 ug kanhi Presidente Rodrigo Duterte sa 2016, gitigom dayon nila ang gabinete sa samang adlaw sa ilang inugurasyon.
Si Marcos Jr. nag-party una sa Malakanyang para sa ika-93 nga sumad sa adlawng natawhan sa iyang inahan, si kanhi Unang Ginang Imelda Romualdez Marcos, una nakahunahuna pakigtagbo sa mga sakop sa iyang opisyal nga pamilya nga motabang sa paghaw-as sa nasud gikan sa dakong utang, nagsulbong nga mga presyo ug wa pa mahuman nga pandemya.
* * *
Way klarong katin-awan ang Malakanyang unsay nakapalangay sa pagtudlo sa bag-ong health secretary atubangan sa nagsulbong nga mga kaso sa Covid-19. Pero abunda ang mga timaan nga mas importante parang Marcos Jr. ang showbiz:
• Gitudlo niya si Tirso Cruz III sa Film Development Council of the Philippines human gilugwayan untang termino sa kanhi tagduma nga si Liza Diño; ug
• Gitudlo si Johnny Revillar nga bag-ong pangu sa Movie and Television Review and Classification Board.
* * *
Gipahibawo ni Marcos Jr. nga duha ngadto sa tulo ang tigom sa gabinete kada semana. Tingali gusto lang nga mamawi sa kalangay sa unang tigom. Hinaot nga sa kadaghan sa pangandam sa mga tigom sa Malakanyang, may panahon pang iyang mga kalihim pagpatuman sa ilang masabotan.
Gilalis sab niya ang 6.1% nga inflation rate sa Hunyo 2022 nga gipagawas sa Philippine Statistics Authority (PSA). Kon di motuo sa PSA, hinaot nga wa magplano pag-imbento og alternatibong mga numero. Kon di niya tuohan ang opisyal nga mga numero sa gobyerno, unsa may pasikaran sa iyang mga programa ug mga proyekto?
* * *
- Latest
