Gisaway sa kontra

Dunay mga karsada sa Barangay Apas, Cebu City nga mahisama sa sapa panahon nga kusog ang ulan. Ang karsada dunay drainage system sa masi’g ka daplin, apan mosugwak gyud ang tubig tungod kay dili na makasugakod ang kanal.

Nag-anam kadaghan ang kabalayan nga daw uhong nga nanurok sa kabukiran sa Barangay Apas. Ang kaniadto kasagbotan, karon nalukop na sa kabalayan ug gipangsemento na sa tag-iya sa balay ang ilang palibot.

Unsa may resulta? Ang tubig sa uwan nga kaniadto masuyop ra unta sa yuta nga kasagbotan, karon matagak gikan sa mga atop, ug kay sementado na man ang hapit tanang palibot, modagaydagay na diretso sa kinaubsan.

Mao kini ang rason ngano nga ang kanal dili na makasugakod ug mosuyla na sa karsada ang tubig nga susama na’g sapa. Unya, dunay mga tawo nga kaatbang sa politika ni Kapitan Jingjing Cabigon misaway kay wa kuno’y gihimo.

Kining maong problema, dili na makaya sa mga opisyal sa barangay tungod kay nagkinahanglan kini og dakong kantidad aron masulbad ang problema.

Una, angay’ng himoan og dako ug lawom nga kanal ang masi’g ka daplin sa karsada, lahos na ngadto sa dakong sapa nga gitawag og Mahiga Creek.

Kinahanglang motabang ang kadagkoan sa Cebu City government pagsulbad sa problema, sama sa gihimo sa siyudad sa paghimo og dagkong kanal sa ubang kabarangayan.

Ang karsada nga kanunay’ng bahaan, anaa mahimutang sa kinaubsan sa mga dagkong bungtod nga nalukop-lukop na sa kabalayan.

Ang mga tawo nga namuyo niini mga lumolupyo sa Dakbayan sa Sugbo, ug angay lang nga ang Cebu City government motabang pagsulbad sa problema, ug dili kay pasagdan lang ang mga opisyal sa barangay.

* * *

Mahurot ang kwarta sa kagamhanan sa Dakbayan sa Sugbo kon tumanon ni Mayor Michael Rama nga dili na pangitaan og voter’s certificate nga magmatuod nga botante sa Cebu City ang mga senior citizens nga hatagan og hinabang salapi.

Ang mahitabo niini mao nga kadtong mga tawo nga dunay balay dinhi sa siyudad, pakubrahon nila ang ilang mga ginikanan og hinabang bisan og ang tinuod, tua kini magpuyo sa ubang mga probinsya.

Sa laktod, dili maayo ang plano ni Mayor Rama. Nindot ang nahunahunaan ni Dr. Ester Concha, ang hepe sa Department of Social Welfare and Services (DSWS) nga kinahanglang usa lang ka adlaw ang pagpanghatag sa senior cash assistance kon kada buwan man ang pagpanghatag.

Nagpasabot nga kon dili makakubra, mabalik na sa panudlanan sa siyudad ang kwarta nga para unta sa senior citizens.

Para nako, pabor ko sa maong sugyot. Kon nagpuyo gyud sa dakbayan sa Sugbo gyud ang beneficiary, nganong dili man siya makakubra?