Nanimahong ulog-ulog
Usa ka balaodnon ang giduso didto sa Kongreso nga mag-usab sa ngalan sa NAIA ngadto sa “Ferdinand E. Marcos International Airport”. Gihimug-atan sa awtor ang natampo sa kanhi presidente sa paghimo sa maong pasilidad. Sa kadaghan sa suliran sa nasud nga angayan atimanon, mao ra kini ang balaod nga nahunahunaan ug gihataga’g prayoridad sa maong kongresista.
Nanimahong ulog-ulog ang maong balaodnon. Aduna gyu’y mga tawo nga bisan nangutot ang ilang agalon, mosangyaw gihapon nga humot ang alimyon sa maong utot. Pagkatoytoy!
Tatay apan dili amahan
Misaad si DSWD Secretary Erwin Tulfo nga tabangan ang mga single mothers nga naglisod sa panginabuhi tungod sa kakulang sa suporta pinaagi sa paglutos sa amahan sa ilang anak. Pinasikad ang maong panaad sa R.A. 9262 o Anti-VAWC Law. Maayo ang tumong ni Secretary Tulfo kon mahinayon. Sakit palandungon nga duha ka nilalang ang hinungdan sa pagkatawo sa bata apan usa lamang ang mag-antos pag-amuma kaniya. Tampalasan ang mga amahan nga una pang mipahilak sa ilang mga anak kay sa mga bata nga ilang kaduwa. Fezteleern!
Propesyon, dili misyon
Uyon si Senador Jinggoy Estrada, nga amendahon ang ubang bahin sa Konstitusyon apan babagan niya ang bisan unsang proposal nga mag-lugway sa termino sa mga nasyonal nga mga opisyal. Alang sa senador, “self-serving” ra kaayo ang maong lakang. Luyo ning maong pamahayag, dili mahimong ibale-wala ang posibilidad nga ipatigbabaw ang ilang kaugalingong interes niadtong naghupot sa gahum gumikan sa ilang kahangol ug kamarô. Ning atong panahon diin ang pamolitika dili na misyon kon dili, usa na ka propesyon, mas gialagaran sa politiko ang ilang kaugalingon kay sa katawhan nga ilang gisa-aran nga silbihan. Madahaan!
Suliran sa krudo
Suliran karon sa Philippine National Railways (PNR) kon asa sila mokuha og pundo alang sa kinahanglanon nga krudo kon ipatuman na ang “Libreng Sakay” nga programa alang sa mga estudyante sunod buwan. Dili parehas ang PNR sa MRT nga adunay subsidiya gikan sa kagamhanan. Kon itandi sa kaayohan nga maani sa mga estudyante, gamay ra ang suliran sa PNR ug sayon ra kini mapangitaan ug paagi sa nasudnong kagamhanan. Kon dili makakita’g paagi ang tigdumala sa PNR, duha lang ang buot ipasabot: bulay-og ang PNR o dili madayon ang “Libreng Sakay”. Paleho la!
Gidugtong aron buwagon
Laraw ni Lapu-lapu Mayo Junard Chang nga bahinon ang Sugbo ngadto sa duha ka probinsya diin ang Lapu-lapu City ug ang lungsod sa Cordova molangkob sa Probinsya sa Mactan. Ang maong proposal nakaani gilayon og mga pagsupak sa uban’g mga opisyales sa Sugbo. Kaugalingnan ug awtonomiya ang sagad ipagawas nga rason sa nagpasiugda sa maong lakang. Apan dili usab kalikayan nga maisip sa katawhan nga naghimo lang og bag-ong gingharian ang mga namunoan nga ilang dominahon sa umaabot. Matud pa sa akong amigo, “imbes nadugtong na ang Mactan sa tulo ka tulay, buwagon na hinoon”. Baya no!
- Latest