Posibleng sunod health secretary
Si Dr. Edsel Maurice Salvaña, usa sa gikatahong gipilian nga itudlo nga sunod nga health secretary (ang laing duha maong kanhi health secretaries nga silang Janette Garin ug Francisco Duque III), nipasalig nga di angayng kabalak-an ang pagsulbong sa bag-ong mga kaso sa Covid-19.
Matud ni Salvaña di sab angay’ng kahadlokan ang padayon nga pagsaka sa positivity rate, nga giisip nga sukdanan sa kapaspas sa tinakdanay. Nipuno siya nga di angayng ika-alarma ang pasidaan sa Department of Health (DOH) nga posibleng mosulbong ngadto sa 17,000 ang inadlawng mga kaso.
* * *
Nipasabot si Salvaña nga ang pasidaan sa DOH pangagpas lang. Ang kinatas-ang numero maoy labing grabeng mahitabo kon di magmatngon ang katawhan ug pasagdan ang tinakdanay. Nitataw nga mas taas nga positivity rate kay ang gipaubos sa PCR test mao ra ang mga pasyente nga labing nameligro nga mograbe o mangamatay sa Covid-19.
Matud ni Salvaña ang labing kasaligang timaan sa tinuod nga sitwasyon mao ang gidaghanon sa mga pasyente nga na-ospital. Niingon siya nga kuyawan ta kon katunga na sa Covid-19 beds ang ma-okupahan. Pagkakaron, 20% ra ang okupado.
* * *
Bisan niburot og 60% ang bag-ong mga kaso sa Covid-19 sa niaging semana kon ikumparar sa gisundan nga semana, nipasalig si Salvaña nga kasagaran sa mga pasyente duna ray mild symptoms o wa gyoy timaan sa sakit. 19 ra ang kritikal kon ikumparar sa 14 sa gisundang semana.
Matod niya di grabe ang mayoriya sa mga pasyente kay bakunado sila. Maong nisubli pagtambag sa duha ka kinakusgan nga panagang: Pagsul-ob og face mask ug pagpa-booster.
* * *
Giisip nga alas ni Salvaña aron matudlo sa DOH maong iyang pagdupa sa mga bulilyaso ni kanhi Presidente Rodrigo Duterte ug pagdayeg ni Presidente Ferdinand Marcos Jr. Makatabang sang pag-angkon og kredito sa pagmenos sa mga kaso sa Pilipinas kon ikumparar sa ubang kanasuran.
Laing bentaha ni Salvaña: Bisan gihudlat sa Kapitolyo sa Sugbo, wa mobakwi sa gibisto niyang pagtuon nga ang kaluag sa mga lagda sa Mactan Cebu International Airport nakapaspas sa pagkatap sa Omicron sa Kabisay-an ug Mindanao. Nga posibleng mao say makasawot sa iyang ambisyon: Kon moyango si Marcos Jr. sa iyang mga alyado sa Sugbo.
* * *
- Latest
