Anaa pa ba ang objectivity?

Nahinumdom ako kaniadto sa dihang nagtungha pa ko sa pilosopiya duna mi subject nga phenomenology kun wa ko masayop si Padre Ulrich Gacayan ang among maestro kaniadto. Nahimong sikat si Edmund Husserl kini tungod kay siya man ang Father of Phenomenology. Nahimong inila usab ang termino nga epoche diin kinahanglang makasulti sa iyang kaugalingon ang usa ka butang nga hawa sa bisan unsang subjective bias.

Dunay bias ang matag tawo. Ang maong bias nagasukad sa iyang kaugalingong palibot, kultura, panlantaw ug pagtuo, Kining maong mga sukaranan mao man ang naka contribute sa paagi nga pagasud-ongon sa matag tawo ang usa ka reyalidad. Dili pa lang dugay nahimong gubot ang komentaryo nga gihatag ni Ella Cruz nga nagpunting nga ang kasaysayan daw sama lamang sa usa ka chismis. Kun kinsa ang nagsuwat mao man usab ang iyang pagsabot niini. Sa laktod nahimong daw mag-agad kun kinsa ang magsusulat sa kasaysayan. Apan mahimo bang dili na lang atimanon o tan-awon ang objective part sa kasaysayan? Daghang ang nisawsaw ning maong isyu ug gani dunay uban nga nagdala pa og insulto kun ugaling mohimo ka og komentaryo niining Ella Cruz. Makuyaw kun mamahimong relative na lang gyud ang tanan ning atong kapanahonan karon. Bisan gani ang kalabot sa balansayon sa moralidad, sa hinay hinay nahanaw na ang absolute o dili ba kaha buot wad-on ang giisip natong absolute. Subo kini palandungon apan maoy nahitabo ning mga panahona karon. Ang matag usa mohimo og kinaugalingong hubad sa kasaysayan nga mosibo sa iyang kaugalingong panginahanglan. Imbis makab-ot ang kahiusahan, mahitabo naman hinuong mas modaghan pa hinuon ang pagka siak siak kun kin man ugaling ang magpadayon. Alang Kanako magpabiling objective ang kamatuoran labina kun kini pinasikad sa napulo ka sugo sa Dios nga bisan gani ang pinakalantip nga tawo dili man gyud kmakahimo og pag-usab niini. Unta, mahibalik ktia sa pagmata nga sa sinugdanan pa lamang duna namay han-ay ang tanan. Dili ba kaha ni epekto sa giingon nilang Age of Aquarius mao nga daw dili kaayo definitive ang desisyon sa matag tawo? panlantaw kin isa matag New Agers nga nanagna nga ani ana kita sa bag-ong hugna sa pagkinabuhi.