EDITORYAL - War on drugs ni BBM

Napupos na ang termino ni kanhi presidente Rodrigo Duterte apan nagpabiling problema sa nasud ang ilegal nga drugas nga maoy iyang gipasalig nga papason.

Apan karon dili na gramo lang ang nangsakmit sa operasyon sa mga otoridad kondili kinilo na gyud ug gituohang gikan pa kini sa China, ang nasud nga gisuod sa administrasyon ni Duterte.

Dinhi lang sa Central Visayas, moabot og P4.4 bilyones nga ilegal nga drugas ang nasakmit ug kapin 55 mil ang nangadakpan sugod Hulyo 1, 2016 hangtud sa Hunyo 30,2022 pagtapos sa iyang termino.

Sa report sa Philstar.com, ubos sa pamunoan ni Duterte ang opisyal nga gidaghanon sa napatay sa kampanya kontra ilegal nga drugas 6,117.

Sa samang report, giingong sa unang mga pamahayag sa liderato sa kapolisan nga kadugayan ilaha ra sab gibakwi, moabot og 8 mil ang napatay, wala hinuoy eksplinasyon nganong 6 mil kapin nalang kini karon.

Apan sama gihapong report,  kun ang mga human rights groups maoy pasultihon, ang tinud-anay nga gidaghanon sa mga napatay moabot gyud og kapin 30 mil.

Daghan ang mikwestyon ug nagdudang ang uban niini biktima sa pagabusar sa mga otoridad sa paggamit sa ilang pwersa, samtang ang kapolisan miinsister sa sagad nilang pangatarungan nga “nanlaban” maong ilang napatay.

Hinuon duna nay gihimong imbestigasyon ang International Criminal Court kabahin niini. Sila nay bahala kun unsaon nila pagprubar ang mga alegasyon batok sa kampanya kontra ilegal nga drugas ubos sa administrasyon ni Duterte.

Karon si Presidente Ferdinand “Bongbong” Marcos Jr. dili sama ka makahadlok og bahad o pasalig kontra ilegal nga drugas apan mimando kini sa bag-ong gitudlong kalihim sa Department of the Interior and Local Government nga ipadayon ang kampanyang nasugdan ni Duterte. Apan ang bag-ong kalihim nga si Interior Secretary Benhur Abalos miingon nga lahi ang ilang estratehiya ug puntariyahon sa kampanya.

Kun sa panahon ni Duterte daghang mga street level drug pushers ang na-neutralize, ang mga source o tinubdan sa ilegal nga drugas maoy tutokan sa kampanya karon.

Mga tinubdan nga posibleng diin gikan kining mga kinilo-kilong shabu nga mao na pirmeng masakmit sa police operations. Ang ilegal nga drugas  usa sa rason sa pagsaka sa kriminalidad sa nasud, makiangayon lang nga dili kini lung-an.