Samtang padayong nisulbong
Sa kataposang ihap sa Department of Health (DOH), niabot na og 3,706,951 ang tanang kaso ug 60,578 na ang tanang nangamatay sa Covid-19 sukad sa pag-ulbo sa pandemya kapin sa duha ka tuig ang nilabay. Pero para ni Presidente Ferdinand Marcos Jr., di na paigo sa pagtudlo dayon og bag-ong health secretary.
Nadugangan og 1,302 ka bag-ong kaso ug 13 ka bag-ong patay sa Covid-19 niadtong Sabado, Hulyo 2. Pero para ni Marcos Jr., di dinalian ang panginahanglan sa pagtudlo dayon og bag-ong tagduma sa pandemya.
* * *
Hangtod sa akong pagsuwat ini, tulo na ka adlaw human nibanos si Marcos Jr. sa Malakanyang, wa pay natudlo nga puli ni kanhi Health Secretary Francisco Duque III. Way katin-awan ang bag-ong presidente ug ang iyang mga tigpamaba sa hinungdan sa misteryuso nga kalangay.
Bisan ang DOH nipahibawo nga sila sab nagpaabot og giya sa Malakanyang ug sa pagkatudlo sa bag-o nilang kalihim. Hasta si Duque, nga hagbay ra untang gipalagpot tungod sa kriminal nga pagpabaya ug pagpangurakot sa pagduma sa pandemya, nideklarar nga di na magpabilin sa DOH.
* * *
Nagsugod nang upisina ni Marcos Jr. pag-accredit sa vloggers ug social media influencers para sa press conferences sa Malakanyang. Pero way nipasabot kinsay mga posibleng itudlo nga health secretary, o kon may gitanyagan na ba pero wa pa lang modawat o nibalibad na.
Nagtukod na si Bise Presidente Sara Duterte Carpio og mga sanga sa iyang upisina sa Sugbo, Davao ug ubang bahin sa Pilipinas. Pero way nag-apura paghulip sa higanteng kang-a sa liderato sa usa sa labing importanteng ahensiya.
* * *
Kasagaran sa mga gitudlo ni Marcos Jr. sa iyang gabinete gihangop sa ilang katakos. Pero may mga tinudlo sab siya nga klarong bayad sa iyang politikanhong mga utang ug ulug-ulog sa iyang politikanhong mga alyansa.
Hinaut nga ang kalangay sa pagtudlo sa bag-ong health secretary nanukad sa makuti nga paningkamot sa pagpangita sa labing kasaligan nga makatiwas sa pamakuna ug makahaw-as sa nasud gikan sa pandemya. Hinaot nga wa mahigot sa binilyon ka pesos nga balor sa mga transaksiyon sa pandemya sa gisundang administrasyon. Kay nag-ilog pa ang mga mobanos pagkolekta sa mga komisyon.
* * *
- Latest