Ang aborsyonista

Sa akong nasayran kaniadto sa Canon Law, basin nausab na ni karon, ang si bisan kinsa nga nakasala sa abortion ang mahiagom sa latae sententiae excommunication. Si Arsobispo Cardillone ang nihimo og pagdili nga si Pelosi ang pakalawaton. Apan kining maong linalang sa dihang nahiabot sa lingkoranan ni Pedro ang nakadawat sa kalawat nga gihikaw kaniya sa obispo. Tingali ang rason mao nga mas mahinungdanon ang kaluoy kaysa silot.

Tingali dili kaayo bug-at ang aborsiyon mao  nga pakalawaton dayon. Sayop tingali ang obispo mao nga wala paminawa sa papa. Sayop ba kaha ang pagtulon-ang moral sa simbahan kay nganong daghan man ang naligutgot sa dihang Nibali ang pamalaod sa pagdili niini karon sa Estados Unidos nga unta gibansay naman unta kini sulod sa 50 na ka tuig. Nahigmata tingali ang mga magbabalaod nga ang kinabuhi Sagrado diay kaayo.

Mao tingali ni kun nganong ang mga unggoy dili makadawat nga kita nagagikan kanila. Ang bugtong rason mao nga walay unggoy nga niunay og patay sa iyang kaugalingong anak. Ang tawo lamang.

Nakahaling kini og dakong kalagot ug kadismaya kanilang naningkamot aron mamahimong makatuman sa kasuguan nga gilatid sa balaod sa gugma sa kinabuhi. Kun atong ibutang nga tungod sa kalooy mao nga pakalawaton kining maong tigpaluyo sa tig-amoma sa kultura sa kamatayon, ang hingtungdan mas ginudnod man nuon sa kalaglagan.

Wala paminawa ang mga nagmasinugtanon ug nagpakabana sa Balaod sa kinabuhi. Bisan gani ang sagradong orden dili man seguridad nga mahimong molikoy ang gigasahan niini. Ug labaw sa tanan makaingon ta, sinugdanan na ba kaha kini sa pagkagun-ob sa gituhohan natong molungtad hangtud sa kahangturan?

ugtong panahon lamang ang makatugkad. Hilom ang Dios sa atong pag-ampo mao nga atong himoon ang panaw padung sa atong kasingkasing basin atua didto ang tubag sa atong mga pangutana kun nganong nahimong dulom ang tanan alang kanato.