Gifted to give

Hulyo 3, 2022: Ikanapulog-upat nga Domingo sulod sa Tuig

Mga Pagbasa: Is. 66;10-14c/Sal. 66/Gal. 6;14-18/Lk. 10;1-12,17-20

Kini ang nahimong ulohan ug hilisgotan sa dihang gisaulog dili pa lang dugay sa atong nasudnong simbahan ang 500 years of Christianity.

Nakadawat og Gasa mao nga ang nadawat ipaambit usab. Mao kini ang tema sa ebanghelyo  karong Dominggoha diin ang atong Ginoo nipahimangno nga sa pagkadawat sa gasa nga walay bayad kinahanglang mopammbit usab niini sa walay pagpaabot usab og bayad. Dugang pa, ang atong Ginoo nagpahinumdom nga:

1. Kinahanglang dili magbagood sa daghang palas-anon ang matag panaw nga pagahimoon ni bisan kinsang tinun-an. Dili lang kini mahitungod sa mga butang material kondili hasta na usab ang disposisyon ni bisan kinsa. Ang kawili sa bisan unsang butang o tawo mamahimong babag man sa mas tunhay nga panaw padulong sa kahingpitan.

2. Anaa na ang pag-atiman sa Dios bisan wala pa ang tinun-an moabot. Ang mga tawo sa katilingban maoy mohatag sa mga panginahanglan ni bisan kinsang magsasangyaw. Kini aron maka pokus ang tanan diha sa pagmantala sa Maayong Balita.

3. Ang pagsanong sa mga panginahanglan sa katilingban. Ang pag-ayo sa mga masakiton, paghingilin sa mga yawa ug paghatag og paglaum mao man ang mga konkretong tubag sa mga panginahanglan niadtong mga higayona.

Gifted to Give. Kining maong hagit gikinahanglan aron mamahimong mas masabtan nga ang panaw padulong sa kaluwasan dili lang usa  ka personal nga paningkamot. Katilingbanon kini busa angayan lamang nga kita manginlabot niini.