Sa kalibotan sa mga bakak
Bisan sa iyang awhag atol sa inugurasyon nga di angay’ng molingi sa kagahapon kon dili molantaw sa umaabot, si Presidente Ferdinand Marcos Jr. niinsistir pag-usab sa kasaysayan aron pagpamugos sa sayop nga pangangkon nga nilampos ang diktadura sa iyang amahan sa pagpalambo sa nasud ug katawhan.
Sa iyang pag-angkon nga sa tanang nangaging mga presidente iya rang amahan ang nakapalambo sa suplay sa pagkaon, gilubag niya ang aktuwal nga mga panghitabo. Ang binuang nga mga programa ni Ferdinand Marcos Sr. niresulta sa kagutom ug mas lapad nga kalisod sa katawhan.
* * *
Bisan gilalis sa mga ekonomista ug ubang mga opisyal sa gobiyerno, giwarawara nilang Marcos Jr. ug sa iyang maguwang nga si Senador Imee Marcos ang kalamposan sa mga programang Masagana 99 ug Kadiwa sa ilang amahan.
Ang tinuod mao nga ang Masagana 99 napakyas pagpalambo sa produksiyon sa bugas humay, nibangkarota sa mga mag-uuma nga wa kabayad sa utang, ug nipahagsa sa 800 ka rural banks. Ang Kadiwa, nga nisawo sa bulilyaso sa Masagana 99, napakyas pagbarato sa bugas ug ubang palaliton ug niresulta sa mas dakong alkanse sa gobiyerno.
* * *
Tungod ba kaha kay nahinayak na sa dakong gasto sa gipabaha nilang fake news, ang kampo sa mga Marcos, sama sa gipulihang pamunoan ni kanhi Presidente Rodrigo Duterte, di mauwaw ni mangayo og pasaylo bisan masakpan na ang ilang mga bakak.
Gani, magpapating sila og balikbalik sa napamatud-an nang mga bakak. Kumbinsido tingali nga kapoyan ra ang mga nangurihir, o malabwan sa mas sibaw nilang trolls, ug ang ilang sayop na lang nga kasayuran ang magbarug.
* * *
May sukaranan ang ilang pagsalig nga ang kinabag-an sa katawhan di interesado sa kamatuoran. Ang 31 milyones nga nibotar ni Marcos Jr. sa niaging eleksiyon maoy gisandigan sa ilang pagtuo nga ang katawhan moyango bisan unsay ilang isulti.
Bisan gipasidan-an sa iyang tinudlo nga mga sakop sa gabinete nga imposible ang P20 kada kilo nga bugas humay, mahimong ila gyong banhawon ang Masagana 99 ug Kadiwa. Di importante para sa mga Marcos kon, sama sa orihinal nga mga programa, mapakyas na sab. Ug mas mag-antos pa gyod ang katawhan. Kay naglaom nga makakita sila og mas humot mga palusot.
* * *
- Latest
