Bahad ni Rama

Dihang iyang gimando nga sugdan ang imbistigasyon sa pasangil sa anomaliya pagpanghatag sa hinabang ngadto sa mga biktima sa bagyong Odette, masuk-anong mibahad si Mayor Michael Rama nga iyang hutdon og taral sa hukmanan ang mga responsable ug hukasan sa maskara atubangan sa publiko pinaagi sa pagpublikar sa ilang mga pangan.

Iyang gimandoan ang resident Ombudsman sa City Hall nga humanon ang imbistigasyon sa dili pa magsugod ang iyang termino karong udtong tutok sa Hunyo 30.

Matud niya nga buot niyang sugdan nga husto ang bag-ong mandato nga gihatag sa publiko ngadto niya.

Mao sab ni hinungdan nganong sugod sa Hulyo 1 dunay 500 ka mga kawani sa City Hall ang wa nay trabaho tungod kay wala na i-renew ang ilang mga kontrata.

Ambot unsay hinungdan, sila ray nasayod tungod kay tihik ang City Hall paghatag sa mga detalye nganong wala na i-renew ang kontrata sa maong mga kawani.

Masabot hinuon nga politika ang hinungdan. Posible nga ang maong mga kawani mga dumadapig pa sa mitaliwan nga mayor nga si Edgar Labella.

Balik sa bahad ni Rama, iyang gitug-an sa miaging adlaw nga duna na siyay kompletong listahan sa mga tawo nga nalambigit sa anomaliya sa pagpanghatag sa hinabang ngadto sa mga biktima sa bagyong Odette.

Apan sukwahi sa una niyang pasiatab nga ibulgar ni sa publiko nagdumili si Rama sa paghingan na tungod kay confidential o sekreto kuno ang listahan.

Abi ko ba og gusto ni Rama nga magsugod sa husto. Way laing hustong buhaton gawas sa paghubo sa maskara sa mga tawong mapahimuslanon.

Ug way confidential sa listahan sa mga tawo nga nangawkaw sa buhis sa katawhan.

Wala man tingali maglambigit og nasudnong seguridad ang maong listahan aron pugngan ni Rama ang pagpahibawo niini ngadto sa publiko. Kun buot si Rama nga motuo ang publiko sa iyang mga pulong angayang iyang tumanon ang iyang bahad.

Itaral sa hukmanan ug ibutyag sa publiko ang mga nangawkaw sa pundo sa kagamhanan ug nagpahimulos sa mga biktima sa kalamidad alang sa ilang kaugalingon nga interest.