Sobereniya sa pagkaon

Huptan ni President-elect Ferdinand “Bongbong” R.  Marcos Jr. ang posisyon isip secretary sa Department of Agriculture. Kini aron iyang matutokan ang krisis sa pagkaon dili lamang dinhi sa Pilipinas kun dili sa kalibotan.

Aron malikayan ang krisis sa pagkaon, gikinahanglan nga mapaniguro ang seguridad sa pagkaon. Apan unsaon pagkab-ot ang seguridad sa pagkaon kun pabilin nga ibaliwala sa Kongreso ang sektor sa agrikultura.

Kun wala mo masayod, ako mong sayran nga sa P270 bilyones nga gahin nga gipangayo ni Secretary William Dar sa Departamento sa Agrikultura, P85.5 bilyones lamang ang gigahin sa 18th Congress.

Ang administrasyon ni Presidente Rodrigo Roa Duterte nangutang og binilyon ka pesos alang sa iyang Build, Build, Build nga proyekto apan wala gayod maapil niini ang pagtukod og mga dam aron makatabang sa pagsupply og tubig sa mga umahan nga wala pay tubig.

Datus sa departamento adunay 1.1 ka milyon ka areas sa agrikultura ang wala pa maabti og supply sa tubig pang agrikultura.

Dugang datus, 30 porsiyento sa total land area sa Pilipinas gitikad sa lima ka milyon ka mga mag-uuma. Apan mora’g dili na kini mao ang gidak-on sa luna nga gitikad sa mga mag-uuma tungod sa land conversion.

Daghan nang angricultural lands nga gipanghimo nang commercial, industrial ug residential. Sama sa siyudad sa Carcar diin ang lapad mga basakan gipangtamnan na og mga building.

Aron makab-ot ang seguridad sa pagkaon, gikinahanglan nga awhagon ni Marcos Jr. ang Kongreso sa pagpalabang og balaudnon nga mag-regulate sa land conversion. Hatagan usab sa Kongreso og sakto nga budget ang departamento sa agrikultura nga igong magamit sa panginahanglan sa maong departamento.

Sugyot nako sa administrasyon ni Marcos Jr. nga maoy kab-oton ang sobereniya sa pagkaon ug dili lamang ang seguridad sa pagkaon aron makasegruo ta nga dili ta gutomon.