EDITORYAL-Tikasang gasolinahan

Maayo ang gibuhat sa mga buhatan sa Cebu City Hall ug sa kapolisan paginspeksyon sa kalibrasyon sa mga gasolinahan dinhi sa dakbayan.

Sakto kaayo kini kay karon pwerteng mahala sa presyo sa petrolyo. Ang kaniadto budget sa gasoline o krudo sa naandang mga lakaw gamit ang sakyanan dili na paigo tungod sa kamahal.

Tuod man, sa gihimong inspeksyon sa nakalabay nga mga adlaw duna gyuy mga gasolinahang nasakpan nga wala gi-calibrate ang ilang mga pumping stations.

Intensyonal man o wala, dili tingali katuohan nga kining wala nila pag-calibrate sa ilang pumps makaalkanse kanila.

Angay pasalamatan sa mga motorista ang Cebu City Police Office, Prevention, Restoration, Order, Beautification and Enhancement (PROBE) ug Cebu Environmental Sanitation and Enforcement Team  (CESET) nga maoy nihimo og inspeksyon.

Maayo nga gipasirad-an ang pumps nga wala ma-calibrate kay kun magpadayon kini, pila pa ka gatos kaha ka mga motorista ang matikasan.

Gani, dunay ubang mga gasolinahan nga makaduda kaayo ang gitubil sa tangke kay mura lang og mas daghan ang hangin imbes nga gasolina ang mogawas sa ilang pumps.

Tanang mogawas sa nozzle sa pumps moagi sa metrohan, unsaon man kaha pagkasiguro nga ang gitubil likidong gasolina ba gyud ug dili lang hangin?

Matag patak importante kaayo para sa mga motorista ilabi na sa mga nanarbaho. Karon nga lisod kaayo ang suholan tungod sa kagamay ug kamahal sa palaliton, dili nalang unta apilan sa mga gasolinahan og surambaw ang ilang pagpamaligya.

Usa sab sa mga nabantayan aning mga gasolinahan, nga kung mosaka gani ang presyo matag litro, dali kaayo silang makailis sa presyo apan kun oil price decrease gani, pwerteng dugaya nila mopaus-os kay ang ilang rason, wala pa daw mahurot ang una nilang napalit sa mas mahal nga presyo.

Kung duna may nag-inspeksyon sa mga gasolinahan matag dunay kausaban sa presyo, murag kinahanglan tingali ninyong magkugi pagbuhat sa inyong trabaho.

Tinud-on sab unta pagpamulta o silotan ang mga gasolinahang masakpang manikas.