EDITORYAL - Di pa panahon ni Sotto

Wala maapil sa mapilii sa mga NBA teams sa bag-ohay lang natapos nga National Basketball Association draft 2022 ang 7’3 foot nga si Kai Sotto nga nakapadismaya sa milyon-milyong Pilipino basketball fans kagahapon Hunyo 24,2022.

Dinhi sa Southeast Asia, naghawod ang Pilipinas sa basketball ug dili kabentahaan ang mga koponang gipadala niini sa mga international competitions sama sa FIBA. Mao nga daghang mga Pilipino fans ang naglaum nga maapil gyud si Kai sa NBA draft karong tuiga bisan sa kinayamukmokan nga NBA team.

Kay siya maoy mamahimong labing unang full-blooded Filipino nga makasulod sa kasaysayan sa NBA.  Sa pagkakaron, dunay duha ka mga NBA players nga dunay dugong Pilipino sama nila Jalen Green ug Jordan Clarkson, parehong mga Filipina ang ilang mga inahan.

Niadtong 1978, dunay laing Filipino-American nga napili sa NBA anang tuiga, siya si Raymond Towsend.

Tingali dili pa karon, apan walay laing dunay abilidad ug height nga dunay dakong tsansang nga usa ka Pilipino ang makasulod sa kinadakoan nga basketball association sa kalibotan, walay lain kondili si Kai ra gyud sa pagkakaron.

Kun nahitabo pa nga si Sotto usa ka Chinese, giilogan na kini sa mga teams tungod sa kadako sa market para sa NBA products ug viewers didto sa China.

Bata pa hinuon si Sotto sa edad nga 20 anyos. Walay basketbolista sa kalibotan nga wala mangandoy nga masulod sa NBA.

Mahimo pa gihapon siyang mopadayon og duwa sa Australian NBL aron mamanso pa gyud og maayo iyang abilidad ug suwayan pagbalik ang NBA draft sa sunod tuig sa edad nga 21 anyos.

Apan pwede gihapon siyang moapil sa NBA G League ug NBA Summer League kon diin daghan sab mga NBA players karon nagagikan.

Sa pagkakaron, ang labing maayong buhaton sa mga Pinoy basketball fans ug bisan dili hilig sa basketball walay lain kondili ang padayong pagsuporta kang Sotto sa iyang pangandoy. Kay angkunon man o dili, tanang mga Pilipino, mahiligon man o dili sa basketball nangandoy nga makakita og purong-dugong Pilipino nga makaduwa sa NBA. Kadako niini nga garbo para sa tanan.