Si Padre Romeo Lopez

Dunay usa ka pari sa usa sa mga Diyoesis sa Luzon ang nipadayag sa iyang tinguha nga motapon gikan sa pagka Katoliko ngadto na sa pagka Iglesia ni Cristo. Nahimo siyang pari sulod na sa 35 ka tuig. Nihukom siya nga mobalhin siya sa pagka Iglesiya gumikan ning mosunod nga mga rason:

1. Iyang nakita nga mas dako ang pagmahal sa INC sa Balaang Kasulatan.

2. Disiplinado ang ministro ingon man mga miyembro

3. Mas konkretong pamaagi sa pagpakabana ug pag-atiman sa usag usa ingon nga simbahan.

Sa akong tan-aw, dili lang ni kalabot sa doktrina. Hinunoa sa iyang dakong panginahanglan diha sa natad sa kalambigitan. Bisan pa man kun bright siya kay tiaw mo na nahimo siyang Magna Cum Laude didto sa Roma apan ang maong pasidungog wala makahatag kaniya og katagbawan isip tawo ug pari.

Kun madayon kini makahatag kini og dugang pang kasagmuyo labina sa mga parokyano apan sa laing bahin garbo sa habig sa INC. Usa ka dakong kalipay ug kadaugan alang   nga dunay pari ang mobiya sa pangalagad aron lamang mohangop sa maong desisyon.

Sa tinuod lang dunay mga higayon nga mamahimong kapoy kaayo ang pagkapari labina sa mga panahon nga nagkinahanglan ka og suporta apan walay si bisan kinsa nga mohatag niini. Dunay mga higayon nga sa imong tan-aw ang kahulogan sa pagkapari nahanaw ug nahimong daw walay kapaingnan ang tanan.

Bisan gani ang imong giisip nga kasaligan tungod kay kamo igsuon sa pangalagad apan mamahimo kining mantsa sa panaghigalaay kay ang imong gisaligan mahimong kanimo mounay. Kutob lang sa pag-ampo ug ritwal ang tanan. Kining maong ritwal ug pag-ampo kun ugaling dili mahatagan og mas konkretong aksiyon magpabilin mang usa ka patay nga balansayon nga dili makahatag og dugang kadasig sa katawhan nga nangandoy og usa ka buhing pagtuo.

Akong giampo ang maong pari ug nanghinaut lamang ako nga unta malipayon siya sa kaulahian.