Kalamboan sa siyudad

Tan-aw nako, tawhay kaayo ang pagpatuman sa mga programa ni Mayor Michael Rama sa pagpalambo sa Cebu City atol unya sa bag-o niyang administrasyon nga magsugod karong Hunyo 30.

Kini tungod kay iyang mga kaalyado ang kadaghanan sa mga sakop sa Cebu City Council, ug sigurado gyud nga maaprobahan ang gusto niyang buhaton alang sa kaayohan sa siyudad.

Upat ra ka konsehal nga alyado sa BOPK ang midaug, ug ikalima si Konsehal Franklyn Ong nga nagpabiling ex-officio member sa City Council isip presidente sa Association of Barangay Councils (ABC).

Sa ato pa, kon dunay botasyon sa mga sakop sa City Council kay magkasumpaki sila paghukom sa pagatukion nga isyu, siguradong kadaghanan sa mga konsehal adto gyud mosuporta sa gusto sa mayor.

* * *

Ang nagustohan nako ni Mayor Rama kay kon magsuroy-suroy ni siya sa lainlaing dapit sa siyudad, kanunay’ng igmat ang iyang mga mata nga motan-aw sa mga angayang trabahoon.

Dihang nagkakuyog mi si Rama kaniadto uban sa mga reporters sakay sa iyang service vehicle, nakita niya ang mga basura nga wa makuha daplin sa karsada.

Dihadiha, gikuha niya ang iyang cellphone ug gitawgan ang hepe sa Department of Public Services ug giingnan nga ipakuha dayon ang maong mga basura.

Supak usab si Rama sa pagbutang og mga sementado nga road barriers taliwala sa karsada kay kon dunay emerhensya, maglisod ang mga sakyanan sa pag-iway... ug husto kaayo siya sa iyang gihimo.

Basta kay makapaabot kita nga ang lapad kaayong rotunda diha sa eskina Gorordo ug Salinas Drive (JY Square) pagamyan kana ni Rama aron molapad ang karsada.

Unya, kanang eskina nga bahin gikan sa Salinas Drive paingon sa tuo (Marco Polo Hotel), giplanohan kana ni Rama niadto nga pahakan aron dili lisud ang pagkurbada.

Daghan kaayong nindot nga mga gihimo si Rama, apan wa lang kaayo ma-highlight. Kumbinsihon nako si Mayor Rama nga ibalik gyud nato ang aseras para sa publiko.

Sa Taboan District, daghang aseras nga giukopar na sa mga tag-iya sa balay. Suheto kaayo ko niini kay diha sa eskina Lakandula ug B. Aranas, botika kana sa akong Lolo kaniadto.

Makita nimo karon nga wa na ang lapad kaayong mga aseras kaniadto. Tan-awa, atubangan sa Taboan Market sa dalan Lakandula, (kanang gikan sa eskina Sanciangko Street) gikural apil ang aseras.

Nahimo kini sa mga mapahimuslanong tag-iya og kabalayan kay natulog ra man ang nagdumala sa siyudad kaniadto. Ang mga gitugyanan sa maong gimbuhaton, maayo ra modawat sa ilang sweldo.

Aw, nawala na man gani ang usa ka karsada diha sa Barangay Pasil kay gipangtukoran og daghang balay! Ato ni nga atimanon mayor Mike!