Silang Marcos, Leonen ug Robredo
Way makabasol ni Ferdinand Marcos Jr. kon mosubay sa mga badlis sa iyang palad, o sama sa iyang amahan mangonsulta sa mga numero, aron pagpangita og tubag sa labing uwahi niyang kalibog:
• Napugos niya si Sara Duterte nga mas taas og rating niya sa pag-us-os pagka bise presidente;
• Nakatigom siya og 31 milyones nga mayoriya sa eleksiyon sa Mayo 9 bisan sa makasaysayanong kadasig ug kakugihan sa mga boluntaryo ni Leni Robredo; aron lang
• Ma-engkuwentro niya pagbalik ang labing di niya kinaham nga mahistrado sa Korte Suprema, si Marvic Leonen.
* * *
Di mabasol si Marcos Jr. kon naglungutlungot sa resulta sa una nilang engkuwentro:
• Ambot nituo tingali sa ulug-ulog ni Presidente Duterte pag-retire niadtong 2018 kon si Marcos ang modaog sa recount sa pagka bise presidente;
• O nagsalig nga mayoriya sa Korte Suprema nga nagsilbing Presidential Electoral Tribunal tinudlo nilang Duterte ug kanhi Presidente Gloria Macapagal Arroyo; aron lang ma-raffle ang iyang electoral protest ngadto ni
• Leonen, kinsa malampusong nikumbinser sa tanang mahistrado sa pagbasura sa protesta ni Marcos ug pagpatigbabaw sa kadaogan ni Robredo.
* * *
Sama sa unang engkuwentro, way gihimo si Leonen ning ikaduhang panag-abot. Isip senior associate justice sukad niadtong Sabado, Mayo 14, sa pag-retiro ni Justice Estela Perlas-Bernabe, si Leonen ang mangu sa Presidential Electoral Tribunal.
Nga makalihok lang hinuon kon may electoral protest batok ni Marcos.
Pero ang taas nga ranggo ni Leonen makahimong mas dako sa iyang tingog sa paghusay sa petisyon pag-disqualify ni Marcos.
Nga kon dasonan sa mga mahistrado, mopalingkod sa Malakanyang sa laing karaang karibal ni Marcos, si Robredo.
* * *
- Latest
