EDITORYAL - Mga pasilidad sa F2F classes

Usa sa mga sagubangon karong pagbalik na sa face to face classes kining mga nangaguba nga mga buildings sa mga nagkadaiyang pangpublikong mga tunghaan.

Duna pay pipila ka mga tunghaan nga wala pa gihapon mapaayo ang nangalangkat nilang mga atop human sa bagyong Odette niadtong bulan sa Disyembre.

Karong sunod nga mga adlaw, gikatakda na ang pagbalik sa face to face classes. Kinahanglan unta nga kun sugdan na gyud ang klase, nahuman na kining mga nangaguba nga mga lawak-saringan.

Kaning mga nagkawil-kawil nga mga sin sa atop, mga kahoy ug metal trusses peligro kini para sa mga bata.

Hinuon dili man sab kini ipagamit tingali sa mga prinsipal, apan mas maayong managana nalang daan tungod kay duna ra ba gyuy mga batang magkiat-kiat.

Maayo hinuon nga kadtong lang pinili nga mga tinun-an sama sa kompleto sa bakuna ang prayoridad nga makaapil sa face to face classes kay momenus ang gidaghanon sa mga bata.

Gawas sa mga nangaguba nga atop, naa pay ubang tunghaan nga wala pay klaro ang ubang pasilidad sama sa kasilyas, limpyong suplay sa tubig ug uban pa.

Hinuon, ang pipila niini naatiman naman tungod sa nakalabay nga eleksyon, apan duna pa gyuy uban nga wala.

Ang DepEd gusto ng mobalik sa face to face classes ang mga bata, naghinamhinam na sab ang mga tinun-an para niini, apan kinahanglan nga siguraduhon og maayo nga andam na sab ang mga tunghaan para modawat aning mga bata.