Managlahing manok sa politika

Opisyal na nga giindorso sa partidong Barug-PDP nga gipangulohan ni Cebu City Mayor Mike Rama ang BBM-Sara tandem, si presidential aspirant Bongbong Marcos ug kapares niini nga si vice presidential aspirant Sara Duterte sa umaabot eleksyon.

Giapahibawo kini mismo ni Rama atol sa presscon niadtong nakalabayng adlaw didto sa Rama compound human sa ilang meeting sa mga miembro sa partido.

Kahinumduman nga mipadayag ang mayor kaniadto nga maghuwat siya sa iindorso ni President Rodrigo Duterte nga mao usab ang ilang pilion apan wala pa man mo-endorse si Presidente Duterte og mga kandidato nga suportahan.

Suod si Rama ni Senador Bong Go nga maoy most trusted sa pangulo busa posibleng gihonghongan o gihatagan na og clearance niini ang mayor nga pwede na siya mag una una sa pagpahibawo sa ilang suportahan.

Sa karon, tataw ug dayag na kinsa ang gipaluyohan sa mga major parties sa dakbayan sa Sugbo diin ang kampo sa BOPK una nang mipadayag sa ilang gisuportahan nga mao si Vice President ug presidential aspirant Leny Robredo, gawas lang seguro ni vice mayoralty candidate Franklin Ong nga mora’g lahi ang suportahan. Si mayoralty candidate nga si Konsehal Dave Tumulak wala pa usab mobutag kinsa ang iyang suportahan sa mga national aspirants.

Balikan nako ang sitwasyon sa local administration party o kampo ni Mayor Rama, atol sa ilang presscon ang BARUG-PDP ra man. Unsa nahitabo sa kaalyado nilang Partido Panaghiusa nga gipangulohan ni Atty. Joey Daluz?

Impossible kaayo nga mosuporta si Daluz kang Marcos nga ang inahan niini nga si Inday Nita nabantog man kadto nga anti Marcos, out of the picture na ang Panaghiusa party kong BBM na ang hisgotan. Hinoon walay kwestyon sa kang Sara Duterte kay mao gyud kini ang suportahan sa grupo.

Mura'g kulba hinam ang mosunod nga panghitabo sa politika sa Cebu City kay murag dunay twist nga mahitabo. Unsa man magpabilin pa ba nga kaalyado sa BARUG-PDP ang Panaghiusa ni Daluz o posible kaha nga mobuwag na sa hingpit ug makig alyansa sa laing kandidato? Mga pangutana lang kini nga seguradong matubag sa umaabot nga mga adlaw.

Dunay mga prinsipyo nga maapektohan sa panahon sa politika, akong himoong sanglitanan si Konsehal James Athony Cuenco ang anak ni kanhi Congressman Antonio Cuenco nga nailang anti martial law crusader o anti Marcos sama ni Inday Nita.

Kauban siya sa BARUG-PDP nga miindorso kang BBM, akong gipangutana human sa presscon diin matud niya nga desisyon kini sa partido ug dili usab siya makasupak. Hinuon sa personal niyang gibati nagpabilin gihapon ang mithi sa iyang amahan.

Desisyon nila ang tanan kon asa sa tan-aw nga makaayo nila sa umaabot nga eleksyon kay kong modaug man makapadayon sila sa ilang serbisyo.

Sa sitwasyon sa BARUG-PDP basin sa presidentiable lang nagkasungi ang ilang prinsipyo ug dili maapektohan ang lokal nga kamada ug magpabiling lig-on ang ilang panag alyansa.

Posible kaha nga magkahiusa gihapon ang grupo bisan managlahing manok ang iindorso?