EDITORYAL - P5 mil ayuda hain na?

Nalipay ang kaliboang mga Oponganon nga nahimong benepisaryo sa tag P5 mil nga ayuda nga bag-ohay lang gi-release ni Mayor Junard “Ahong” Chan.  Ang maong ayuda para sa mga labing grabeng naapektahan sa bagyong Odette nga miigo niadtong Disyembre 16, 2021.

Apan samtang ang Lapu-Lapu nakapanghatag na bisan dili tanang mga apektado sa ilang siyudad ang nahatagan, maayo na kaayo kini para sa mga angayan gyung makadawat sa maong ayuda.

Ang ubang mga local government units sa Sugbo ilabi na sa Mandaue City ug Cebu City ingon man ang ubang component cities sa probinsya wala pay gidungog nga nanghatag na sila sa maong ayuda.

Daghan na karong nagsige og post sa social media nga nanukot sa ilang mga mayor bahin sa maong ayuda.

Ang tag P5 mil mao kini ang gimando ni Presidente Rodrigo Duterte nga tabang para sa mga biktima sa bagyong Odette. Nga tag P5 mil kada panimalay ang ihatag.

Apan Department of Social Welfare and Development –Central Visayas daan ng mipahibalo sa tanang mga mayor sa Sugbu nga dili tanang pamilya ang mahatagan sa maong ayuda gumikan kay kuwang ra ang budget nga gipagawas para niini.

Sa probinsya palang sa Sugbu, dunay kapin 90 mil ka pamilyang naapektahan og maayo sa bagyo, samtang kaliboan sab nga pamilya ang sa Metro Cebu. Apan ang budget kuwang man, unsaon kaha pagtuman ang mando sa presidente?

Ang mga mayor ug mga opisyales na sa LGUs maoy mangita og paagi aron ang hatagan kadto ra gyung mga kabus nga naapektahan sa bagyo.

Apan mitiyabaw man sab ang uban tungod kay katalagman man kining miigo, walay pili ang naapektahan, adunahan man o kabus.

Kinahanglang mosabot lang unta ang uban nga dili mahatagan bisan og nakapirma pa sila og papel sa ayuda ilabi na kun sa mismo nasayod nga duna pay mas nagkinahanglan sa maong kantidad nga ilang mga silingang kabus.

Ang nakaparat ani karon kay nagkaduol na ang eleksyon ug may purohan nga mapasanginlan gyud ang mga lokal nga opisyales nga gigamit sa kampanya ang pundo.