Pagkawagtang sa COVID-19
Nia ang labing yano nga pagpapasabot sa mga pangagpas, uban ang abunda nga panghinaut, nga -matapos na gyod ang pandemiya sa COVID-19 karong tuiga, kapin sa duha ka tuig human nagsugod sa Wuhan, China niadtong Disyembre 2019:
- Maangkon na sa kalibotan ang herd immunity batok sa kagaw sa mosunod nga pila ka buwan tungod sa kumbinasyon sa pagpamakuna ug sa tinakdanay; ug
- Kay wa na may bag-ong matakdan, bisan ang pipila nga way bakuna ug wa pa matakdi di na mataptan tungod sa proteksiyon sa mayoriya, mawagtang nang Covid-19.
* * *
Di mga bugoy sa sunod eskina ang nihimo sa mga pangagpas. Mga eskperto sa nagkalainlaing kanasuran gidasonan na karong bag-o sa mga siyentipiko sa World Health Organization (WHO). Ang makalipay nilang panglantaw naglakip hinuon sa pahimatngon: Kadaghan na ta nakugang ining kagawa maong posibleng pakugangan na sab ta niya.
Unsa man ang papel sa Omicron ning pagsulbong sa pagsalig nga ato nang nasinati karon ang sinugdanan sa kataposan sa pandemya? Dunay duha ka managlahi nga mga pangagpas unsay natampo sa labing mananakod sa variant:
* * *
Una, may mga nagtuo nga ang Omicron maoy mopatay sa pandemya, dungan sa paspas niyang pagpanakod paspas sab nga ni-mutate ang kagaw ug mas dali ug mas dako ang kahigayonan nga mausab siya ngadto sa porma nga di nang kapanakod hangtod nga mamatay; ug
Ikaduha, may mga nagtuo nga ang binilyon ka katawhan nga nabakunahan ug ang binilyon nga nataptan sa Omicron mohatag og proteksiyon sa 80-90% sa kalibotanong populasyon nga igo nang makapahunong sa pandemya.
* * *
Pero ang pagkawagtang sa COVID-19 karong tuiga gipasidaan sa mga eksperto nga molungtad lag pila ka buwan. Sa di pa matapos ang 2022 nagtuo silang mobalik ang kagaw. Pero di nang pandemya. Kay taras sa kagaw ang paglahutay pinaagi sa pag-mutate sa mas huyang nga bayhon.
Mahimong mas huyang sa Omicron. Mora na lag sip-on ug ubo. Kon mawagtang ang COVID-19 sa pipila ka buwan ug mobalik dayong tapos karong tuiga sa bisan unsang porma, mas andam nang mas daghan, mas barato ug mas epektibong mga tambal. Nga tingali makatabang pagpabalik sa unsay atong naandan.
* * *
- Latest
