Inday gipalig-og samot BBM-SARA tandem

May grupong nanawagan-hangyo ni Davao City Mayor Inday Sara Duterte-Carpio nga patalikdan si presidential aspirant Bongbong Marcos (BBM) ug mobalhin sa pakigtandem ni Manila City Mayor Isko Moreno.

Ingon niini kangil-ad ang politika sa Pilipinas. Kon sa tan-aw sa mga kaatbang nga may usa ka parisan nga grabe ka kakusog ang suportang nakuha gikan sa katawhan, buhaton nila kutob sa unsay ilang mahimo aron mabungkag kini.

Apan dili usa ka talawang langgam ang pagkatawo ni Inday Sara. Nga kon yugyogon ang mga sangang nagsangga sa salag nga nagsapnay nilang duha ni BBM, molupad dayon palayo sa gikauban ug adto na mobatog sa laing punoan.

Sa usa ka interview sa SMNI News channel, gipangutana si BBM kon unsay iyang komento bahin sa ISKO-SARA tandem nga panawagan?

Ania iyang tubag:

“Well, ah…hindi naman...na ano? Maganda ang naging sagot niya. Dahil talaga kami ang tandem. Kami ang magka-partner.

Ay kagaya ng kaniyang sinabi, maganda nga yong kanyang statement.

Na sinabi niya, na hindi na man kayo pipilitin kung ano ang gagawin ninyo? Kung sino ang iboboto ninyo? Ngunit, hindi siya puwedeng sasama sa kanila. She cannot support that effort because she is behind the Marcos-Duterte partnership.

And that just, each time this happens, that it strengthens the partnership.”

Ingon niini katibay ang mga desisyon ni Inday. Bisan si Pres. Rodrigo R. Duterte, iyang amahan, kinsa gustong manghilabot sa desisyon sa anak, wala makatandog. Ang laing tawo pa kaha?

Gihinuktokan pag-ayo ni Inday og mga adlaw kon unsa bang puwesto ang iyang pinaleng lansaran nga haom niya: Presidente ba, o Bise? Usab, iyang giestudyohan kinsa ang dapat ipares, diin diha unya sa ilang pagpangalagad sa katawhan, kanunay silang magkasabot ug magkahiusa?

Ug si BBM maoy gipili ni Inday nga maayong himuong presidente sa Pilipinas. Ug kay misaad nga iyang tabangan, naumol nilang duha ang BBM-SARA tandem.

Hinungdan, nga bisag giunsag daot si BBM sa mga kaatbang sa politika, gipalig-on pa hinuog samot ni Inday ang ilang tandem.

Kini tungod kay may daghan man siyang nakit-ang bulawanong gawi ni BBM nga wala makit-i sa mga kaaway sa politika, kinsa nagsige lag labay-buhos og lapok sa pagkatawo niini.