Kamo, may tubig ba?

Kaming mga nagpuyo diri sa bukid, unahan nga bahin sa Marco Polo Plaza Hotel, magpasalamat gyud sa Metro Cebu Water District kay upat na ka kadlawon nga miagas ang among mga gripo.

Lahi mi sa mga lumolupyo diha sa downtown area sa Cebu City nga kon maagasan lang gani og kadlawon, magyawyaw dayon. Kami, bisan og duha ka oras lang nga pag-agas kada adlaw malipay na mi kaayo.

Salamat kaayo MCWD chairman Joey Daluz III; MCWD General Manager Stephen Yee ug ni Engr. Michael Diola sa water distribution department nga kanunay’ng mosanong sa akong hangyo.

Mga tulo ka tuig na nga ang among mga gripo sa tubig diri sa Upper Barangay Apas, maagasan lang kon mag-inject ang tanker sa MCWD, apan karon miagas na. Maayo unta kon padayon na ni.

Hinuon, karong mga Hulyo, mahuman na ang Lusaran-Lahug Bulk Water Project nga maghatag og 24-7 nga agas sa tubig sa mga nagpuyo diri sa kabukiran. Salamat daan MCWD.

* * *

Daghan ang nangutana kanus-a kuno madawat nila ang gisaad nga tag P5,000 nga hinabang gikan sa kagamhanan sa Cebu City para sa mga nabiktima sa bagyo?

Ambot kanus-a, ug kon kinsa ang hatagan. Ang pait diha kon kadtong grabe kaayo og nahiaguman sa bagyo dili makadawat, ug kadto ra’ng naguba ang dunot nilang atop sa kasilyas maoy mag-una.

Mas maayo unta kon ang administrasyon ni Mayor Michael Rama mopa-paspas sa pag-release sa maong mga hinabang. Daghan pa tawon ang wa makapabarug pagbalik sa ilang mga nangatumba nga kabalayan kay way kwarta.

Naghimo lang sila og mga barung-barong nga kon mag-uwan, sakripisyo tawon kaayo. Makasinati gyud ko niini kay apil ko nga nahiagum sa kabangis ni Odette.

Gilupad ang tibuok nakong atop ug nangabasa tawon ang akong kagamitan.

* * *

Kadaghan sa mga gipanghilantan, giubo, gisip-on karong panahona uy!  Kon kining mga tawhana nagpahiling pa og doktor sigurado nga misamot kadaghan ang ika-report nga natakboyan og virus.

Apil ko sa miaging semana nga nagluya, apan misukol ko ug wa gyud magpadaug sa kaluya sa akong panglawas. Mitrabaho ko ug nagpasingot kanunay pinaagi sa pagtrabaho.

Kini ra gyud ang sekreto pag-alkontra sa hilanat kay kon magpadaog ka sa kaluya, mosamot ang hilanat. Mangatawa ra gyud mi nga akong mga amigo nga gipanghilantan.

Miabot sa among hunahuna nga kaniadto, sa gamay pa kita, hilantan man gihapon, ug dili ra man mahadlok kay wa pa man mauso ang COVID-19.

Tungod sa akong pagsukol sa virus nga mitakboy nako, misibat kini nga nagpanglingo. Hehehe.