EDITORYAL - Kooperasyon ang kulang

Daghang hinungdan nganong nisaka ang mga kaso sa COVID-19 dinhi sa nasud. Usa sa hinungdan niini kining pagdasokdasok na sab sa mga tawo human giluagan ang restriksyon.

Sa mga pasaheroan gani karon wa nay social distancing ug wa na gisunod ang gimando nga limitasyon sa gidaghanon sa makasakay. Gipanangtang na sab ang mga barriers nga magbuwagbuwag unta sa mga pasahero.

Daghan ang mga pamaagi aron kini makontrol,  apan gikinahanglan ang kooperasyon sa publiko. Ang Omicron variant sa COVID-19 mao karoy gisuspetsahang hinungdan sa pagsaka sa kaso. Paspas kining manakod apan dili kaayo grabe ang sintomas sa mga tawong bakunado, apan peligro sa mga dili bakunado.

Gawas sa pagpabakuna, kinahanglan usab nga sundon ang health protocols sama sa pagsuot kanunay og facemask, social distancing ug magpuyo sa balay. Ang problema lang, mikumpiyansa ang mga tawo sa dihang giluagan ang restriksyon, mura og walay nakat-onan sa nakalabay nga duha ka tuig sukad nitugpa ang virus dinhi sa Pilipinas.

Dili unta kini mahitabo kun ang mga tawo misunod lang gyud sa basic protocols aron di matakboyan.