Politika ug kurapsiyon sa ayuda

Miabot sa 6,942 ka mga reklamante ang nagreklamo batok ni Lapu-Lapu City Mayor Jonard “Ahong” Chan tungod sa pasangil nga bisan apektado sila sa bagyong Odette, wala sila makadawat og ayuda.  Sa 6,942 ka mga reklamante, 500 nila ang miduso og kaso batok ni Mayor Chan sa buhatan sa Ombudsman.

Dili gyud kalikayan nga aduna gyod magreklamo kun maghisgot na og ayuda kay nabatasan na sa uban nga kun maghisgot na gani og ayuda halos tanan gustong makadawat bisan pa dili sila kuwalipikado nga makadawat og ayuda. Pero dili gyod pod ikalimod nga adunay wala makadawat og ayuda bisan pa og kuwalipikado tungod sa politika.

Ang mga Oponganon dugay nga nakadawat og ayuda tungod sa bangi sa politika tali ni Mayor Chan ug sa kontra niya sa politika nga si Kongresista Paz Radaza. Ang labing sakit mao nga dugay nang nahatag ang ayuda apan wala pa gayod sila maapil niini bisan kuwalipikado sila nga modawat. Mao ni ang akong gituohan nga nagtukmod sa mga naagrabyado sa pagsang-at og kaso batok sa mayor sa buhatan sa Ombudsman.

* * *

Gibandilyo ug giwara-wara ni Mayor Lani Peña ug Atty. Rajib Enad ang tagsa ka sakong bugas nga tag 50 kilos nga ilang gihatag sa 31,000 ka mga Minglanilyahanon nga apektado sa bagyong Odette. Matud pa nila nga ang ilang gihatag nga bugas dili bugas sa National Food Authority o NFA.

Ang ubang lokal nga kagamhanan igo lang nakahatag og tag lima ka kilong bugas pero ang lungsod sa Minglanilla tagsa gyod ka sakong bugas nga tag 50 kilos.

Dalaygon ang gihimo sa pamunoan ni Mayor Peña. Pero, ang akong pangutana, wala ba gi-overpriced ang gipalit nilang bugas? Sa una god, ila man nga gi-overpriced ang gipamalit nilang bugas nga ilang gipanghatag sa mga apektado sa gipakanaug nga lockdown tungod sa COVID-19 matud pa sa report sa Commission on Audit. Gawas nga overpriced, dili pa gyod makit-an ang tindahan nga ilang gipalitan sa bugas. Wala ko namasangil, nangutana lang.