"No vax, no ride"

Nahimong sentro sa lantugi husto ba o dili ang Department of Transportation (DOTr) sa pagpatuman sa "no vax, no ride" policy didto sa Metro Manila taliwa sa pagsulbong og balik sa mga kaso sa COVID-19 dinhi sa nasud tungod sa mas mananakod nga omicron variant.

Daghan ang nahingawa sa posibilidad nga ang polisiya ipatuman lukop nasud aron masanta ang pagkaylap sa omicron variant diin duna nay kumpirmadong 22 ka mga kaso dinhi sa Central Visayas sigun sa Department of Health.

Ang Land Transportation Franchising ang Regulatory Board (LTFRB-7) hinuon miingon nga wa pay kamandoan nga ipatuman ang maong polisiya dinhi sa rehiyon.

Ang lokal nga mga opisyal sab sa Sugbo mideklarar na nga dili mopatuman sa maong lagda.

Ila ning gihulagway nga anti-poor sanglit ang maapektuhan niini mao lang ang public commuters nga way kaugalingong sakyanan.

Kun nagsunod mo sa akong lindog, dugay ra kong nagsugyot nga ipatuman ang "no vax, no ride" policy.

Usa ni sa mga paagi aron mapugos ang wa pay bakuna nga magpabakuna. Wa man tingali lalis nga ang bakuna maoy bugtong paagi aron ta makalingkawas sa pandemya?

Alang nako di maisip nga anti-poor ang pagpatuman sa "no vax, no ride" policy sanglit libre ang bakuna nga gihatag sa gobiyerno.

Wa may bayad ang pagpabakuna busa bisan ang mga kabus mamahimong makapabakuna.

Sa argumento nga ang mga kabus lang nga way kaugalingong sakyanan ang maapektohan niini, natural tungod kay ang tumong sa polisiya mao man ang public transport diin mas taas ang kahigayonan sa tinakdanay.

Sigun sa pagtuon sa medical journal, The Lancet, mas taas ang porsiyento nga manakod ug matakdan ang way bakuna itandi sa mga bakunado.

Susamang pagtuon sa Center for Disease Control (CDC) nagbutyag nga kalima pil-on ang pagkamananakod sa tawong way bakuna.

Kun imong pasagdan ang way bakuna nga moipon sa mga bakunado diha sa pampublikong sakyanan mas piligro alang nila nga matakdan ug manakod sa laing way bakuna.

Sa isyu sa tawhanong katungod, atong hinumduman nga di lang ang mga way bakuna ang duna niini.