Shortage sa tambal?

Kanunay mosulpot sa akong newsfeed sa Facebook ang mga post nga wala nay available nga paracetamol ug ubang halos tanang tambal nga dali rang mapalit kaniadto bisa kadtong walay resita.

Busa akong gisuwayan og sulod ang mga botika diin giuna nako ang mga dagkong pharmacy sa dakbayan sa Sugbo, Mandaue ug Lapu-Lapu. Nasuta nako nga tinuod gyud out of stock na sila sa mga tambal sa hilanat, sip-on, ubo ug kalibanga.

Human kuno mikusokuso ang bagyong Odette wala na gyuy stock, managsama halos ang tubag nila nga walay nangabot nga supply gikan sa kaulohan. Pastilan usa naman ka buwan human miigo ang bagyo wala pa gyud ang tambal?

Samtang gisusi nako ang supply sa mga gagmay’ng botika ug didto nasayran nako nga naay available apan limitado lang ang ilang supply labi na sa branded nga paracetamol nga maoy naandan.

Nganong mangita pa man nianang paracetamol nga giendorso og artista nga naa man diay generic paracetamol nga available.

Nganlan lang nako ang botika nga mao ang TGP naa silay igong supply sa tambal, dili man popular apan pareho ra og epekto sa branded.

Sa ingong niini nga sitwasyon makapangutana kita, naa ba gyuy shortage sa tambal? Posible kaha nga adunay nagpaluyo niini aron mosamot ka hadlok ang mga tawo o ba kaha mamanipula nila ang presyo.

Sa pagsugod sa pandemic, ang alcohol ug facemask ang blockbuster hit nga wala usay stock. Karon nga niigo na ang omicron ang mga tambal na sad. Kadtong sa panahon sa delta nganong normal ra man ang supply sa mga tambal?

Karon na hinuon nga daghan na ang nabakunahan mobalik na usab kita sa sinugdanan sa atong kahadlok? Unsay kaposlanan niining bakuna nga murag wala may kalainan sa una ug karon ang kabalaka nga gibati sa katawhan.

Samotan pa nga wala gyuy mapalit nga tambal sa botika, usa ka buwan na nga ingon niini ang sitwasyon unsay gihimo sa mga LGU niini? Ang Cebu City mopalit og 2 million ka buok nga paracetamol alang sa mga tawo. Maayong lakang kini apan gikinahanglan nga sutaon nila ang tinuod kong tinuod or artificial shortage lang kini ang nahitabo.

Basin baya og gigamit ang shortage sa tambal isip pagpanghadlok sa mga tawo aron mosugot nga mabakunahan.