“No vaccination card, no entry” wa tumana

Usa sa nakaaghat nako sa pagpatusok og anti-COVID-19 vaccine mao kadtong unang pahibalo ni Presidente Rodrigo Roa Duterte nga dili makagawasgawas sa balay ug makasulod sa mga estabalisamento, malls, restaurants ug sa ubang dapit-tapokanan ang mga tawo nga wala pa mabakunahi’g kompleto.

Busa, bisan asa ko moadto, magdala gyod kog fully vaccinated card. Apan subo kaayo palandungon, nga wala gyoy guwardiya ni tindera nga mangita niini sa mga mall ug kan-anan nga akong nasudlan. Hinuon, akong anak, miingon nga may mall nga pangitaan gyod og vaccination card ang mga customer.

Sa reclamation area, may mga restawran nga tiglutog mga lamiang pagkaon nga pirmeng gidugok sa daghang mangaon. Dili pangayoan ang nangaon og fully vaccinated card. Bayad ra gyod sa mga gikaon sa customers ang nakamaohan.

Hinungdan, nga nangandoy kong aduna untay mga polis, kinsa hilig og seafoods nga mangaon dinhi. Buwahan, masayran kon ang nagdumala, dili ba gihapon mangayoag vaccination card? Sanglit, nagduda ko, nga may alas silang gisaligan nganong maisogon nilang gisupak ang “No vaccination card, no entry” policy sa atong pangulo? Ug ang maong pagduda natubag dihang nagbansiwag sa mga mantalaan nga si Cebu City Mayor Mike Rama mipahibalo nga dili na niya ipatuman ang maong palisiya sanglit naluoy siya sa kahimtang sa mga magpapatigayon nga hagbay rang gipalukapa sa pandemiya.

Naigking ko sa iyang desisyon. Kinsa bay mas taas og ranggo: Siya, o si Duterte? Unsa bay angay palabihon: Ang seguridad sa kadaghanan, o ang dinagkong kita sa mga negosyante? Dili man pasirhan ang mga balay-patigayon. Tanang bakunado, welcome man. Ang dili bakunado ray gidid-an. Nagpasabot ba kini nga mas daghan ang wala magpabakuna kay sa nangabakunahan? Dili ba, bisag ikontrol sa gobiyerno nga mga bakunado ray pasudlon, mokita man gihapon ang negosyante?

Unya, pinaagi sa maong pagsunod, madisiplina ang tawo ug narespeto pa gyod ang mandar sa atong kinatas-ang lider. Hinuon, katungod ni Mayor Mike ang kutob sa unsay iyang ipasunod nga balaod, isip epektibong hinigiban nga makalupig batok sa Omicron variant natong taga siyudad sa Sugbo.

Ug kon kining mga balaora nagustohan ba sa katawhan o wala, matubag kini inig ka human sa May 9, 2022 election.